公視新聞：http://goo.gl/X2WZUM
【世界台】北美洲大麻行向合法
2015/11/10
文 / 周盈成
以下這篇短文，是用教育部公布的台語標準用字寫成。一點都不難，認得中文、略通
台語， 就懂八九成了。還有聲音檔唸給你聽，許多字詞也超連結到教育部《臺灣閩
南語常用詞辭典》。看世界新聞，兼學台語文，就是【世界台 ~ Sè-kài Tâi】啦
聲音檔：https://soundcloud.com/infactnews/skt151110-marijuana
北美洲這站大麻合法化ê動力真強。Canada ê新總理Justin Trudeau主張修法，容
允欶大麻；Mexico最高法院頂禮拜做出有利開放ê判決；美國嘛可能會有愈來愈濟州
開放。長久以來共這種植物看做毒品、對伊開戰ê做法，咧欲來反輾轉。
研究一般公認，大麻對人體健康ê影響，比薰佮酒koh較輕。Mexico ê政府、主流民
意佮天主教會猶是攏反對開放。最高法院11月初4判決，欶大麻做議量是憲法保障ê
個人自由，政府應該愛同意四位原告ê申請，核准in種大麻予家己使用佮交換使用。
這个判決干焦針對個案，袂隨改變法律，毋過會使料算有愈濟人會來申請，政府嘛著
准，到時，禁止ê政策會真歹繼續。
Mexico判決ê前一工，美國Ohio州ê選民才公投否決大麻開放做醫藥佮娛樂用途ê提
案，毋過這毋是簡單ê是非題，提案內底同時予大財團專賣ê權利，致使真濟支持大
麻開放ê人為著反壟斷，甘願投反對票。
美國自2012年到今，已經有四个州開放大麻食tshit-thô而且會當買賣，是Alaska、
Washington、Oregon、Colorado。 聯邦法律猶是禁止，只是Obama政府主張聯邦避免
干涉各州。
開放並毋是完全無管制，開放ê壓力愈來愈強，主要是反省著幾十年開大量金錢佮司
法資源，共種作、持有佮使用大麻ê人掠去關，無意義koh顛倒有負面效果：監獄已
經無夠關，烏市ê價數愈懸，烏社會利用這趁錢，政府koh抾袂著稅。
明年美國koh有幾若州欲公投這个議題，包括加州。評論者講，若是加州嘛予大麻合
法，規逝美國西岸，向北到Canada、Alaska連做伙，Mexico若koh大力取締，就無啥
意義矣。反倒轉來講，若是Mexico先合法，美國主導ê聯合打擊大麻行動嘛無法度繼
續落去。北美洲大麻合法ê趨勢，看來是無法度擋矣。