公視新聞：http://goo.gl/7RlqSE
【世界台】法國反恐的新挑戰
2015/11/16
文 / 周盈成
以下這篇短文，是用教育部公布的台語標準用字寫成。一點都不難，認得中文、略通
台語， 就懂八九成了。還有聲音檔唸給你聽，許多字詞也超連結到教育部《臺灣閩
南語常用詞辭典》。看世界新聞，兼學台語文，就是【世界台 ~ Sè-kài Tâi】啦
聲音檔：https://soundcloud.com/infactnews/skt151116-paristerror
Paris ê恐怖攻擊兩工後，法國出動軍機轟炸Islam國（IS）佇Syria ê基地。法國
總統佮總理喙講ê「開戰」未來成敗如何，法國ê行向至少有兩方面真關鍵，分別是
對Syria現政權ê態度，佮按怎處理國內ê種族關係。
法國資深記者Pierre Haski佇英國《衛報》發表文章講，Paris恐攻事件，會迫使法
國改變伊ê Syria政策。佇西方盟國內底，法國一向上堅持欲推翻Syria總統Bashar
al-Assad，這本來嘛是美國ê立場，毋過美國後來躊躇矣。
2013年，Assad用化學武器攻擊平民，這踏著美國總統Barack Obama進前畫ê「紅線
」。法國ê戰鬥機已經準備欲起飛，美國佮英國煞攏毋振動，法國也只好取消行動，
François Hollande總統感覺受著孤立佮反背。
Syria ê戰爭按呢koh拍兩冬，死傷無數。兩個月前，露西亞宣佈加入「反恐」，救
援長期盟友Assad政權，那拍IS，那拍西方支持ê叛軍。
美國佮露西亞在內ê十幾國對10月底開始，佇Vienna開會討論Syria ê前途，目前同
意愛促成停火、成立臨時政府、佇18個月以內舉行選舉。毋過，Assad ê未來，猶是
上歹ê議題。法國嘛猶原堅持Assad完全袂當參與未來ê政府。
這篇評論講，這擺的恐怖事件了後，Hollande受著ê壓力會愈大，著決定是毋是愛先
莫插Assad，專心對付IS。實際上，佇伊ê政府內部，這幾個月以來，這種聲音嘛愈
來愈大。
偏右ê前總理Dominique de Villepin禮拜日佇電台受訪ê時嘛講，上要緊是消滅IS
，欲做會到這點，愛參Assad對話。
12年前做外交部長ê時就反對侵略Iraq ê Villepin並且警告，政治領袖這時用「開
戰」這个詞真危險，會跋落IS挖ê陷坑。伊講，因為「in就是欲叫咱分裂、共咱ê國
家向內戰」。
這點，美國ê反恐專家Harleen Gambhir嘛表達類似ê看法。伊講，IS就是欲造成西
方社會ê兩極對立，in欲刺激政府佮主流社會對Muslim反應過度，予規歐洲ê
Muslim不滿，起來跟綴IS ê路線，反抗西方。照IS ê策略，溫和ê Muslim是西方
社會ê殕色地帶，IS欲引誘西方親身來消滅這个地帶，引發全面戰爭。
Gambhir講，真不幸，歐洲極右勢力興起，就是中IS ê計。歐洲應該愛閃避這个陷坑
，反應愛針對恐怖份子，毋通牽連無辜ê Muslim。