https://news.pts.org.tw/article/491301
面對臺灣超高齡社會 嘉義縣偏鄉尤其嚴重
2020-08-20 19:42 最後更新：2020-08-20 19:59
臺灣佇咧2026年就會變做超高齡社會，老大人占臺灣人口的20%；毋過佇嘉義有真濟庄頭，
遮的老大人已經超過50%！咱做伙來看這寡佇故鄉的老大人，按怎過生活。
老大人綴音樂做伙振動，逐家攏誠投入。遮的序大平常時仔逐工攏到社區的長照站來報到
，量血壓、記錄身體狀況。課程有安靜的，嘛有活動的，安排甲誠心適。
這是嘉義縣老化指數上懸的庄頭「義竹鄉溪州村」。家己一个人蹛的76歲序大表示，干焦
三合院，上濟人的時陣蹛三十外个，這馬干焦賰三个人。
偏鄉人口流失，地方產業的經營型態也在轉變。義竹這附近誠濟田攏已經簽予「小地主大
佃農」計畫，不過，袂少年歲超過八十的農民，猶原是堅持逐工欲去作穡。
溪州村上濟人的時陣超過一千人，這馬在籍的人數雖然有五百外人，猶毋過真正蹛佇當地
的干焦270人左右，老大人就占150人。遮的序大堅持蹛咧庄頭，守護祖產佮厝地。
高齡的問題毋但發生佇嘉義，根據國發會上新的數字，臺灣人口今年開始逐年減少，佇咧
2025年會變作是「超高齡社會」，老大人的人口占全部的1/5。毋過佇咧嘉義偏鄉，誠濟庄
頭的狀況，老年歲仔人的比例，早就已經超過五成。
臺灣超高齡社會這粒定時炸彈，時間當咧走，比你我所想的攏緊誠濟。雖然政府捀出長照
計畫、老年歲仔人互相照顧等等政策，猶毋過實現的期程，敢逐會著「極限村落」、甚至
是「滅村」的速度，需要咱繼續來關注。