https://news.pts.org.tw/article/499268
挵鑼奏臺灣歌 台語文創意園區望推母語文化
2020-11-05 19:10 最後更新：2020-11-05 19:16
若講挵大鑼，一定想著鬧熱的廟會。毋過佇彰化的、台語文創意園區，有引進一套叫做"福
爾摩沙之音的銅鑼"。這寡銅鑼大大細細、音階懸懸低低。也用銅鑼演奏台灣民謠，也希望
共母語閣文化，抾倒轉來
響亮不過蓋有雅氣的銅鑼聲響起，你敢有聽出來，這條是台語的經典音樂─望春風。
計共25面的鑼，雖罔肉心看起來平厚，不過逐面攏符合國際標準音，毋但會使獨奏，也會
使合奏。
老師講遮的銅鑼有2个8度，12个半音，半音階就是伊上大的特色。
今年八月，台語文創園區引進吳宗霖老師設計的銅鑼，共囥佇多功能館，希望唌有興趣的
民眾，進入音階的世界，用台語學挵鑼，逐禮拜二透早，園區的志工也會踮遮練習，未來
拍算結合合唱團和鋼琴，佇園區演奏台語歌。
負責營運這个台灣唯一的台語文化創意園區的人，前彰化縣長、也是關懷文教基金會董事
長周清玉講，園區成立到今兩年半，平均逐個月，有三四千人來行踏，雖罔一年會辦2-30
場的活動，不過伊認為推展母語路，猶閣需要濟濟人的覺醒。
為著欲經營了閣較久長，園區也有一半的範圍，這陣當咧整修，周清玉也期待未來園區會
使整合台語教育、文化、民間企業，予母語路愈行愈開闊。