https://news.pts.org.tw/article/539057
東奧頒獎放送國旗歌 臺語劇團創作臺文歌詞
林緯廷 / 嘉義報導 發佈時間：2021-08-08 18:10 更新時間：2021-08-08 18:59
https://youtu.be/arySV9NuEQU
咱的選手佇奧運提著金牌的時，頒獎典禮就會演奏這條國旗歌，這條歌予台灣人民的感受
是真複雜。這陣注心台語戲劇創作的阮劇團，有團員共這條歌重新填詞，寫出一條台語版
本的歌曲。
歌曲：「毋管佇佗位，毋管佇何時，台灣人民，團結鬥陣。」
熟似的歌曲，毋過煞是無仝的語言佮歌詞，原本用華語唱的國旗歌，有劇團的成員用台語
文重新創作新的歌詞來演唱。
阮劇團員 莊庭瑜講，「MC JJ就是這條歌的創造者，伊是想講其實因為阮的母語是台語，
所以阮用台語寫這條歌，伊彼个頭殼內底，浮出來一句台詞就是講，毋管佇佗位 毋管佇何
時，這就變做這條歌的第一拍。」
這條用台語文創作的國旗歌內底，歌詞的意思真好了解，而且內底特別點出台灣人對佗位
來、對佗位去，表達台灣的多元歷史文化。
阮劇團員 李冠億講，「過去攏是唱華語，細漢時仔國小咧學的時陣，其實聽無這歌詞咧講
啥物，這馬改做台語，我感覺會閣較親切，閣較好了解，尤其是閣較接近台灣這塊土地。
」
阮劇團員 吳盈萱講，「另外一句就是共伊反轉來，因為其實咱台灣人民，有一寡人是按呢
足緊入來，嘛有足拍拚會當出去，其實這攏是為著咱台灣和平，為著逐家的希望，行出去
無仝款的所在，行入來台灣。」
阮劇團講，台灣是一个多元的國家，有足濟族群，希望這首台語的國旗歌只是一个開始，
嘛期待無仝語言的族群，做伙來創作各種符合台灣族群的國旗歌。
歌曲：「毋管對佗來，毋管對佗去，千千萬代為和平。」