https://news.pts.org.tw/article/558872
"彰化平原無名英雄"特展 說臺灣街頭運動歷史
鄭雅文 林郁凱 / 採訪報導 發布時間：2021-12-16 19:15 更新時間：2021-12-16 19:49
https://www.youtube.com/watch?v=7fJFbJn16-U
二二八事件紀念基金會，最近舉辦一場「彰化平原無名英雄」特展，展出1987年到2000年
，臺灣街頭運動的過程。嘛是頭一改用參與抗爭的群眾做主角，透過相片、影片等等，予
咱看著爭取過程，攏是有一寡無名英雄咧替咱拚出民主佮自由。
影片呈現街頭運動、民眾對抗警備單位等等，搭配策展人也是作曲家劉學軒特別創作的無
名英雄交響曲，呈現對解嚴前後到第一改政黨輪替，台灣街頭運動的風起雲湧。
拓展文教基金會董事長，翁金珠表示：「當時予400个鎮暴警察規个圍牢，當時中部的團
管區，金司令就佇現場講，今仔日我若予你行出這一步，我一定佇遮就切腹自殺，結果阮
佮伊衝突了後，阮抑是衝破，彰化縣第一改的遊行，就是對阮這改開始。」
像這張平反二二八，群眾主張公布代誌真相、閣有爭取農民權益佮環保運動等等，遮的事
件背後，真濟抗爭者雖然毋知名，煞是民主化背後的無名英雄，翁金珠也表示，伊用六冬
時間口述訪談，採訪欲300位基層民眾，用影片、文字等等記錄歷史，這也是頭改有展覽
用抗爭的民眾做主角，紹介予外界知影。
拓展文教基金會董事長，翁金珠表示：「綴咱佇街頭運動爭取民主自由，抑是講今仔日有
政黨輪替，遐的基層、草根運動者，無名姓咱也無熟似的，沓沓仔共伊揣出來，共伊做採
訪、做記錄，我想按呢台灣的民主運動，彼个鬥圖才會較完整。」
《這个民主台灣的街頭運動-彰化平原無名英雄展》，將縛黃絲帶的路閘囥佇展覽現場，
希望予民眾感受上街頭面對威權，攑拳頭喝出家己訴求的感覺，體會台灣人一步一步行過
遮的路途，才有這馬的民主成果。