其實伊講的無毋著
連佇街仔路凊彩刣人攏袂判死矣
敢有可能干焦酒駕無細膩共人挵死就會判死刑？
講到底
為啥物人會酒駕？
因為伊猶未啉酒的時陣
攏真有自信
感覺袂出代誌
所以才敢駛車出去啉酒
最後共人挵死
這表示講咱愛想辦法
予伊猶未啉的時陣
佇伊頭殼猶清楚的時陣
就會驚矣
按呢伊才毋敢駛車去啉酒
啉酒判死刑是無可能矣
怹嘛知影
所以袂驚
若罰錢
好額人無咧驚啦
散赤人你嘛無伊法
就無財產通執行矣
若講關
酒駕的人遮濟
監獄敢關會落？
好額人會驚關啦
若散赤人啥物攏無矣
敢有差？
所以講到底
真正賰鞭刑佮沒收車輛這兩个方法矣
尤其鞭刑
尻川共拍落去
不管你好額散赤攏疼甲欲死
規工干焦會當覆咧遐
袂振袂動
無法度
咱台灣共酒駕的人權看甲比受害者的人權閣較重要
攏講鞭刑是酷刑
然後繼續予啉燒酒的駛車佇路的四界挵