https://news.pts.org.tw/article/569731
俄烏戰火未停睏 俄國以網路放送假消息擾亂
洪敏真 莊沛文/臺北報導 發布時間：2022-03-01 19:15 更新時間：2022-03-01 19:41
https://www.youtube.com/watch?v=CVNoJpgdTYU
烏克蘭和露西亞猶未戰煞，網路假消息也滿四界，臺灣佇第一時間加入國際事實查核聯盟
，鬥處理假消息。有傳播學者表示，露西亞當發起幼路的資訊戰，利用各種管道散播消息
到世界各地，拍心理戰，達到政治訴求。
厚煙直直對廠房衝出來，規个蒙灰散霧，看著誠恐怖，這支佇推特痟傳的影片，予外國媒
體引用報導，講是烏克蘭首都基輔的發電廠爆炸，落尾經過國際聯合查核，發現是2015年
天津化學倉庫爆炸影片。猶有人翕CNN新聞做圖，共標題改掉、傳假消息。
台灣事實查核教育基金會總編審陳慧敏講，「咱就叫做移花接木型的影片誠濟，閣來就是
咱愛特別注意的就是，俄羅斯伊會透過伊的媒體去做足濟爆料。」
中正大學傳播學系教授胡元輝分析，「俄羅斯的資訊戰其實是非常幼路的攻勢，境外的政
治力量想欲達到一寡政治訴求的時陣，伊一定會先透過資訊戰，來共咱的認知相濫參，阮
就必須愛閣較有警覺。」
有立委嘛指出，最近有人欲換面冊大頭相聲援烏克蘭，無被允許，甚至佇面冊宣傳香港反
送中紀錄片時代革命的文章，嘛予面冊公司降低見光率，煩惱台灣超過2000萬个面冊用戶
，言論自由被操控，呼籲政府趕緊通過數位通訊傳播服務法草案，同時in也發起連署，要
求社群平台公開審查機制。
臺灣永社律師代表黃帝穎呼籲講，「希望講立法院這邊，緊來通過這个《數位通訊傳播服
務法》，NCC未來有這个工具，會使做法律的管制。」
國家通訊傳播委員會綜合規劃處科長劉佳琪表示，「這馬當咧討論的《數位通訊傳播服務
法》草案，伊其實是一个框殼，伊是間接到各部會的相關法令，去判定佗一寡仔內容是違
法的，愛怎樣去處理。」
NCC坦白講各部會議題濟，按怎認定內容違規，有一定挑戰，不過會趕緊將草案送委員會
，抑若面冊公司已經佇烏克蘭安全使用措施，包括暫時禁止揣烏克蘭面冊用戶資料，同
時提升第三方事實查核機構的能力，防止假訊息擴散。