https://news.pts.org.tw/article/585759
價數懸害友善雞卵攏無銷? 國中會考題目惹議
鄭雅文 林郁凱 / 台北報導 發布時間：2022-06-15 19:15 更新時間：2022-06-15 20:00
今年國中會考，社會科有一條動物福利的問題，問講為啥物友善養飼的雞，所生的卵佇臺
灣較無銷？官方答案講是因為價數貴。毋過有動保團體今仔日出來批評，這問題就出佇政
府，無政策輔導才造成這款局面。
雞母予人關佇一格一格狹櫼的籠仔內生卵，這種情形歐盟已經完全禁止，欲予消費者選擇
佇放養等等友善環境所生產的雞卵。今年國中會考社會科出題問學生，友善放養所生的雞
卵，為啥物佇台灣市佔率無懸？大考中心的標準答案講是因為價數較貴，毋過有台灣動物
保護團體認為並毋是按呢。
台灣動物社會研究會研究員 寸舫筑：「到底台灣毋是籠仔飼的雞卵為啥物無普遍？正確
的答案就是，政府欠缺前瞻性的積極政策佮引導。」
台灣動物社會研究會調查大賣場，發見有的籠仔雞的卵佮友善生產的卵一粒才差一角，所
以應該毋是價數的問題。教育部表示，題目主要是欲考學生普遍的生活經驗佮認知。農
委會是強調，以上貴佮上俗的價數來看，有精差甲三倍。就算佮一般價數的雞卵相比，友
善生產的價數確實也貴誠濟。
農委會畜牧處簡任技正兼科長 程俊龍：「可能消費者一般買著的，大概就是六十幾箍到
八十幾箍。若毋是籠仔飼的價數，大部份攏佇百二左右抑是百三，所以事實上有三四十箍
的差距。」
毋過動保團體認為，這種價數的落差，是因為政府無積極引導產業轉型。In呼籲政府，愛
綴歐盟政策的跤步行，上慢應該佇2030年，禁止格籠仔飼雞，重視動物福利。