https://news.pts.org.tw/article/588126
海上比粉鳥只有1.58%飛轉來 動保嗙傷殘忍
郭柏均 張育睿/臺北報導 發布時間：2022-06-30 19:15 更新時間：2022-06-30 19:31
https://www.youtube.com/watch?v=-vTnlwJze4k
臺灣放粉鳥比賽的活動，長期以來攏受著動物保護團體的批評，是因為粉鳥的主人，會共
粉鳥載去外海放，煞有9成以上的粉鳥，因為體力無夠飛袂轉來，就葬身大海。7月真濟人
攏會放粉鳥比賽，今仔日動保團體就和立委召開記者會，要求相關機關重視。
佇咧籠仔內的粉鳥「霸姬」，3月的時予人佇路中央發現、當時伊的翼股已經受傷無法度
飛。因為有跤環，動物保護團體確認伊是比鳥了後、予人棄養的粉鳥，才共收養照顧。動
保團體講，大部份比鳥的粉鳥仔是無遐爾好運。
台灣鳥類救援協會秘書長吳峮毅表示，「遮的粉鳥是少數有法度對海上飛轉來的，但是因
為in無利益、無價值矣，所以in予人放，有的予煮來食，有的予剪翼了後，擲甲遠遠去
。」
動保團體指出，比鳥會駛船共粉鳥載去三百外公里的外海，才放飛予in飛轉來，但是大部
份粉鳥攏無法度承受遮爾長時間、無歇睏的飛行。舊年冬季南海比鳥，計共有4萬5千外隻
粉鳥予載出海比賽，成功飛轉來的賰七百外隻，干焦1.58葩。
農委會畜牧處寵物管理科長宋念潔表示，「跋筊為目的動物競賽行為是禁止的，類似的案
件若無警政抑是檢調In介入調查，干焦靠動保行政單位，破案的機會誠低。」
內政部警政署偵查科長王耀輝講，「會配合動物保護的主管機關，就是農委會遮，若有相
關案件需要調查，相關機關會配合。」
無論是以動保法內底傷害動物的法條開罰、抑是針對以動物跋筊的行為開罰，攏需要行為
出現了後，農政佮檢警才可能會辦。動保團體指出，希望相關單位會使佇比賽宣傳階段，
就開始調查，在場立委陳椒華表示，會閣揣行政院討論、認定主管機關。