公視新聞網 https://news.pts.org.tw/article/594843
精神病人長照示範計畫行2冬 專家提議繼續辦
林思皓 謝季潾/台北報導 發布時間：2022-08-12 19:15 更新時間：2022-08-12 19:45
https://www.youtube.com/watch?v=E8wn87VuPMc
政府實施長照2.0已經五年外，衛福部也有精神病人長期照顧的示範計畫。立委王婉諭今
仔日召開公聽會，真濟專家攏希望這个示範計畫會使繼續辦落去，予特殊的精神病人有專
門的長照中心佮服務。毋過衛福部的官員煞認為，精神病人佮入去一般的長照中心，才是
會當洗清精神病人的名聲。
精神病人因為症頭特殊，衛福部佇2020年開始，特別提出「精神病人長期照顧示範計畫」
。立委王婉諭十二邀請專家召開公聽會，針對這个三年示範計畫提出意見佮對未來政策的
建議。
立委 王婉諭表示：「佇這一兩個月因為休會期，咱去一寡仔機構來參訪和了解了後，發
現其實猶有一寡仔問題，一寡仔現況，是咱可能必須愛提出來做伙討論的，看遮的問題會
當按怎解決。」
有社工表示，第一線的長照服務人員拄著精神病人，定會毋知影按怎佮in相處，因為上過
相關培訓課程的服務人員比例真低。
高雄市立凱旋醫院長照執行長 王君美表示：「人員佇猶未真熟似精神病人的狀況下，當
然會影響伊的評估，所以以目前干焦27.6%，受過相關訓練的狀況這个示範計畫，有繼續
進行落去的必要性。」
雖然在座袂少專家表示，希望精神病人專門的長照中心佮關懷據點會使繼續設立，但是衛
福部心理健康司講，佇人口無遐爾濟的所在，真替精神病人閣設立獨立的長照中心，未
來猶是會以融入一般的長照中心為主。
衛福部心理健康司司長 諶立中表示：「規个來講阮建議採取混合式，就是講以融合式為
主，毋過嘛無反對有單獨的精神長照，用按呢的模式，較會使適應未來的發展。」
衛福部嘛表示，精神病人融合入現行的長照服務體系內底，嘛會使避免汙名化精神病人。