公視新聞網 https://news.pts.org.tw/article/599888
高中早自修予學生家己規畫 私校多數無照規定
林思皓 謝季潾/臺北報導 發布時間：2022-09-14 19:15 更新時間：2022-09-14 19:38
https://www.youtube.com/watch?v=NL313OK_2Zs
高中對這學期(2022年)開始，取消早自修，毋過有一份上新調查煞發現，欲到五成的高中
生表示，學校仝款要求愛早自修，公私立學校也差真濟，公立學校有八成攏遵照教育部的
規定，毋過私立學校，只有二成的學校無安排早自修。
「早自習自由參與愛落實！學生自主規畫無強制！」
教育部規定，111學年開始，高中的早自習時間交予學生家己規畫，學校無應該強迫學生
佇第一節課進前來學校。毋過根據臺灣青年民主協會的調查，猶原有真濟學校無落實新制
度。
臺灣青年民主協會副理事長 何蔚慈表示：「公立學校其實攏做了真好，嘛有符合相關的
法規，但是咱會當看著私立學校，伊拄仔好對反，有75.6% 咧欲八成私立學校的學生是感
覺講，學校無落實早自習新制。」
新北市私立南山高中學生林士軒表示，伊猶是看著有老師佇早自習時間發考卷測驗。對遮
爾濟私立學校違反規定，伊感覺真艱苦。
新北市南山高中學生 林士軒表示：「較早一直認為教育部無法度管私立學校，佇這馬聽
起來足譀的，著無？但你無聽毋著，以前攏認為是按呢。」
青民協佮學生共調查報告送予教育部，呼籲教育部應該愛確實檢核學校落實新制度的情形
，嘛愛提出對私立學校有效的監督方法。
教育部國教署專門委員 詹雅惠表示：「針對無落實的部份，阮會透過私立學校法，或者
是獎補助款考核的方式，去做一个落實督導的機制。」
毋過，有無願意徛名的私立高中教務主任真無奈，表示in欲落實這个新制度的時，真濟家
長是誠反對，驚囡仔失去競爭力，學校只好繼續提供早自習的規畫，予家長佮學生選擇。