公視新聞網 https://news.pts.org.tw/article/600268
嘉義雲霄厝"剖香跤"出名 連26冬辦研習拚傳承
林緯廷 ／嘉義報導 發布時間：2022-09-16 19:15 更新時間：2022-09-16 19:50
https://www.youtube.com/watch?v=7wyp4n4ensQ
嘉義市雲霄社區、雲霄厝這箍絡仔，真濟人咧剖香跤。這做香的香跤，愛剖了會平均會媠
，是一項有技術的傳統產業。為著傳承文化，已經連紲26年、攏舉辦剖香跤的教學活動，
希望傳承雲霄厝「一年四季攏開花，開的攏是香跤花」的歷史記持。
工藝師對鋸竹仔開始，一步一步剖香跤予下跤的囡仔看，嘉義市林森里雲霄社區，舉辦製
香的工藝活動，予囡仔來認捌在地的歷史。
嘉大附小教務主任邱家偉表示：「有這款實際的參與，囡仔會當了解，這个傳統文化的特
色，按怎樣佮生活之間做結合。」
雲霄社區舊地號名雲霄厝，通往諸羅城的雲霄古道，邊仔就是地藏庵，過去就是以剖香跤
出名的產業聚落。毋過人工的製香產業予機器取代了後，這門工藝強欲失傳。佳哉社區26
冬來一直閣有舉辦剖香跤的教學活動，希望會當來傳承記持。
嘉義市林森里長王廣禮表示：「阮這條雲霄古道，會當講家家戶戶攏咧剖香跤，一年四季
攏咧曝香跤花，所以才有一句話講，雲霄厝的香跤花，一年四季攏咧開花，開的就是香跤
花。」
七十歲的邱錦雲講，伊自七歲就學剖香跤，為欲保留社區的特色文化，嘛希望會當揣著人
來學，希望傳統工藝莫因為無人傳承消失去。
工藝師邱錦雲表示：「少年的這代，毋知影香的由來是啥物，按怎一支一支生產出來拜拜
，就是透過阮的演出教學。」
囡仔來上課的老師表示，遮的攏是三年仔的囡仔，逐家對竹仔變成香的過程佮工藝，攏誠
有興趣，嘛希望這項工藝會當繼續保存，予後一代繼續有學習在地文化的機會。