公視新聞網 https://news.pts.org.tw/article/602450
蔣萬安喝5歲列義務教育 陳時中:毋是地方決定
郭柏均 張育睿/台北報導 發布時間：2022-09-30 19:15 更新時間：2022-09-30 19:48
https://www.youtube.com/watch?v=TtKiKZU9_NQ
來看選舉的消息，頭先來到台北市。今仔日9/30國民黨蔣萬安提出教育政策，欲共五歲囡
仔列入義務教育，毋過對手民進黨陳時中認為這不是臺北市府就會當做的代誌，愛和中央
溝通才有可能。
揣來前新北市教育局副局長，佮教育團體徛台。30國民黨台北市長參選人蔣萬安發表教育
政策，對幼兒教育、國民教育、到中等教育等等攏有提出看法，毋過台北市母語流失狀況
嚴重，政策簡報當中煞欠母語教育政策。亻因講，母語政策欲綴中央行。
前新北市教育局副局長 蔣偉民表示：「阮就是按照教育部頒定的課綱施行，若是學校有
需要，以後局內面會補助相關經費，若是師資有問題，阮也會擴大訓練相關師資。」
蔣萬安提出五歲幼兒列入義務教育的政見，無黨籍的黃珊珊也有相關政策，民進黨陳時
中方面目前是無提出。陳時中早時出席工會活動，講著五歲列入義務教育，表示這毋是地
方政府就會使做的代誌。
民進黨台北市長參選人 陳時中表示：「這應該毋是台北市政府就會使做的代誌，愛按怎
佮中央溝通，會使提出按呢的政見，表示伊對這款義務教育，向下延伸的肯定，但是會使
確實佮中央有一寡溝通，才有可能性，阮當然願意佮中央溝通。」
無黨籍黃珊珊出席民眾黨議員參選人的活動。伊佇29接受媒體專訪指出，進前蔣萬安講、
當選上任一冬以內，就會予大巨蛋完工；但是大巨蛋的問題是卡佇內政部，身為立委的蔣
萬安這馬就會使要求內政部加速審查。
無黨籍台北市長參選人 黃珊珊表示：「這馬的案敢毋是佇內政部，伊敢若猶未辭立委著
無，這件代誌敢毋是，伊這馬就會使質詢內政部，為啥物恁愛審遐爾久，伊嘛會使調閱資
料，伊會使知影所有的過程，為啥愛等到伊當選才欲做。」
黃珊珊認為，身為立委的蔣萬安、佮屬於執政黨的陳時中，若欲解決大巨蛋的問題，現此
時就會使開始做。蔣萬安表示，會積極溝通。