公視新聞網 https://news.pts.org.tw/article/606235
臺語團體推語言平權承諾書 籲候選人重視母語
買湘瑩 莊沛文／臺北報導 發布時間：2022-10-25 19:15 更新時間：2022-10-25 19:41
https://www.youtube.com/watch?v=2G3UB5iHV1Y
母語欲傳承，除了民眾家己有意識，嘛需要政策的幫忙。臺語親子共學團佮李江却臺語文
教基金會提出「語言平權承諾書」，希望政治人物重視本土語言教育，擴大囡仔使用母語
的機會。新北市長候選人林佳龍表示，當選了後會更加注重母語政策佮本土文化，現任市
長侯友宜陣營是表示，新北市已經有28間幼稚園施行臺語教學，市長嘛鼓勵逐家加講加學
習。
小朋友一字一字，講出毋願母語失落去的心聲。臺語親子共學團佮李江却臺語文教基金會
提出「語言平權承諾書」，希望各縣市的首長，尤其是參加競選的候選人，會當重視有傳
承危機的本土語言。
李江却臺語文教基金會執行長陳豐惠表示：「阮希望各縣市的縣市長候選人，來簽署語言
平權政策的承諾，因為這需要各縣市佇地方，運用地方行政首長的權力，來推動教育。」
李江却基金會認為，若設立臺語專班抑是臺語共學的基地，會當予國家語言發展法真正佇
地方發根。臺語共學團嘛徛出來，呼籲愛重視囡仔使用母語的權利。
臺語共學團家長代表簡曉娟表示：「阮其實是希望會當去推，佇體制教育內底，會使注
重阮母語囡仔的受教權，阮就是希望政治人物，會使有一寡仔語言意識。」
新北市長候選人林佳龍簽署承諾書，講欲對新北市開始，將母語政策「翻新佮翻身」，現
任市長侯友宜競選辦公室發言人陳柏翰表示，新北市已經有28間幼兒園實施臺語教學，市
長嘛鼓勵逐家加講加學習。