公視新聞網 https://news.pts.org.tw/article/609463
疫情改網路行善 最近1年85%民眾捌線頂捐款
買湘瑩 莊沛文 / 臺北報導 發布時間：2022-11-15 19:15 更新時間：2022-11-15 19:49
https://www.youtube.com/watch?v=wvhjGnRPCfk
臺灣的公益團體自律聯盟，今仔日公佈調查，講這兩年因為疫情的關係，有超過八成的人
會佇線頂捐錢做善事，其中信用卡是上濟人使用的方法，第二崁是用手機支付。自律聯盟
也呼籲逐家，捐錢進前，愛詳細了解公益團體所提供的資訊，毋通去予人騙去。
疫情之下，真濟代誌攏改做佇線頂解決，就連捐錢做善事，嘛會當透過電子產品，用信用
卡抑是QRcode來進行。臺灣公益團體自律聯盟公布調查，這兩冬來，民眾漸漸改變捐錢的
方式，有超過八成的人會佇線頂捐款做善事。
臺灣公益團體自律聯盟秘書長 沈怡如：「大部份的捐款人，其實八成以上攏會使用線頂
捐款的模式，特別是佇這兩冬的比較，阮特別看著手機支付的捐款比例大大增加，對2020
年的11.2%，一直增加到今年已經變做是28.7%。」
臺灣公益團體自律聯盟表示，佇線頂捐款的人，有82.7%攏是用信用卡，閣來有28.7%是用
手機仔支付工具，上尾是有22.7%的人透過線頂的郵局抑是銀行過數。毋過因為一寡捐款
平台的系統無夠密實（bat8-tsat8），有四分一的公益團體，去予網路詐騙集團利用。
自律聯盟建立「好事大平台」，提供民眾正確的捐款資訊，毋通予愛心走入去別人的橐袋
仔
臺灣公益團體自律聯盟理事長 鄭信真：「阮提供分類，猶閣有各種無仝的服務資訊，好
事大平台阮希望是成做一个臺灣公益組織的資料庫，長期會當查證，嘛會當研究，嘛會當
得著閣較濟資訊。」
自律聯盟呼籲民眾，佇網路捐錢毋通衝碰，應該選擇家己熟似的議題、主動了解公益團體
的工作報告，若準有憢疑，一定愛參考有公信力的單位所提供的資料。