公視新聞網 https://news.pts.org.tw/article/610749
台積電設美國廠 王美花:上先進製程定著留臺灣
郭柏均 張育睿/臺北報導 發布時間：2022-11-23 19:15 更新時間：2022-11-23 19:44
台積電創辦人張忠謀進前表示，台積電的3奈米製程，有可能去美國設廠，各界攏真關心
，台積電上先進的製程佮技術，敢有法度留佇臺灣？經濟部長王美花強調，中央一定會想
辦法，共台積電上新的技術、上主要的生產基地、留佇臺灣。
經濟部長王美花23出席台灣精品獎頒獎典禮，頒獎予國內企業，講著台灣長期咧資通訊產
業的好成績，也應用佇濟濟領域、攏有真好的發展，表示政府會繼續幫助企業，行向國際
。
經濟部長王美花表示，「明年度全世界的景氣真緊張，因為國際局勢的問題，所以頂半年
猶是緊張，這个期間咱就是準備。」
發展國際貿易的同時，也關心台灣上新的技術敢有法度留佇台灣。進前台積電創辦人參加
APEC會議，轉來台灣開記者會的時，嘛證實台積電的三奈米製程，有可能去美國設廠。
台積電創辦人張忠謀回應，「（3奈米是毋是有也可能到美國），著，落尾，5奈米了後。
」
經濟部長王美花表示，「現此時到美國設廠的是5奈米，5奈米是2024量產，但是台積電的
3奈米，現此時就已經佇咧台灣台南市量產，另外2奈米的部份，新竹也當咧整地，龍潭科
學園區的三期，也規畫予1奈米使用。」
王美花強調，台灣有完整的供應鏈、佮人才支援，台積電上新的技術、上主要的生產基地
，一定會留佇台灣。中央也會提出修法，確保台灣佇全球半導體供應鏈的關鍵地位。