公視新聞網 https://news.pts.org.tw/article/623933
本土語言貢獻獎 天文學教授用臺語教天文
郭柏均 張育睿 /台北報導 發布時間：2023-02-21 19:15 更新時間：2023-02-22 11:42
https://www.youtube.com/watch?v=LqHknore1VE
講台語，當著時。教育部主辦的本土語言傑出貢獻獎，佇今仔日(2/21)舉辦頒獎典禮，今
年包括前衛出版社的社長林文欽，咧台師大開台語天文學的教授蔡安理，攏得著個人獎；
團體獎部份，是以台語創作的「阮劇團」，閣有用台語宣教的「台灣基督教長老教會雙連
教會」。
教育部長 潘文忠：「自這馬開始，來講咱的話。」
教育部長潘文忠佇21舉辦的本土語言傑出貢獻獎頒獎典禮開場，今年個人獎的部份，由前
衛出版社社長林文欽、佮師大地球科學系教授蔡安理著獎。前衛出版社推動台語文出版幾
十年，對台語文運動、研究攏有關鍵影響；蔡安理以自身天文專業，翻譯各款天文智識，
閣開「台語天文學」課程，對推動台語科學化、正常化有幫助。
前衛出版社社長 林文欽：「台灣台語文盲猶閣足濟，若有法度透過教育系統，各族的人
民，有法度去讀亻因各族的文字，有整個社會環境的塑造，是上蓋理想的。」
臺灣師範大學地科系兼任助理教授 蔡安理：「我對羅馬字開始教，每一个禮拜攏有無仝
款的主題，我有主題擲予亻因，予亻因起來講，所以變成亻因逐禮拜攏會起來講台語。」
團體獎方面，來自嘉義的阮劇團，除了用台語搬戲，戲劇閣有濟濟台灣在地民俗文化，予
觀眾看著台語有真濟可能性。閣有台灣基督教長老教會雙連教會，亻因除了以台語宣教，
幾十年來也推廣濟濟語言文化教育，參與民眾毋但教會成員，也有濟濟社區成員。
阮劇團團長 蔡明純：「阮來國家兩廳院，演一齣足大的戲，阮是用台語講，甚至閣有上
台語字幕，引起真大的討論，會使引起逐家討論，代表講逐家有看著這个物件。」
台灣基督教長老教會雙連教會長老 蘇茂仁：「上蓋重要的就是講，你愛有彼个需求，愛
有彼个環境，家庭有台語文的環境，才有法度好好仔學。」
文化部代表也佇典禮現場表示，母語若會使融入流行文化，對推動母語真有幫助，文化部
會擔起責任。教育部長潘文忠也表示，教育部當咧迒部會結合民間社會力量，規劃推動各
年齡層的國家語言推廣措施。