公視新聞網 https://news.pts.org.tw/article/627307
演唱會"黃牛"漲懸價轉賣 消基會呼籲修法重罰
鄭雅文 林郁凱/臺北報導 發布時間：2023-03-14 19:15 更新時間：2023-03-16 11:15
https://www.youtube.com/watch?v=IAMuCmZx4kc
真濟演唱會的門票攏是一推出就予人搶了了，尾仔就出現黃牛佇網路頂烏白喝價轉賣。消
基會今仔日，呼籲政府愛修改社會秩序維護法，只要有「轉賣趁錢的意圖」就愛重罰。(
這條新聞標題、前言是臺語文。)
熱銷的演唱會票買，閣定定出現有黃牛喝懸價數轉賣，真濟歌迷誠受氣。進前公共政策
網路參與平台有人提案講，藝文表演的票劵著採取徛名制，到今有萬外人支持，毋過欲執
行其實有困難。
消基會副董事長徐則鈺講:「毋是所有的活動攏通賣了，全面實施徛名制，會予其他無需
要檢視逐个入場的人身分的這寡活動拖長時間，增加閣較懸的成本。」
有業者對徛名制有意見，毋過黃牛實在真猖狂，像最近欲來台灣開唱的韓國人氣女團，網
路就有票價千八閣加價賣。消基會十四開記者會，建議政府修正社會秩序維護法第64條的
規定，共原本轉售圖利的處罰著愛是賣出去的運輸、遊樂票券，改做只要意圖轉售營利者
就通掠，希望杜絕黃牛烏白喝價。
消基會秘書長陳雅萍講:「對你的行為，看會出意圖就是欲轉售圖利，按呢就愛罰，你掛
劵基本上我就認為，你有意圖，基本上是按呢，當然你主張你毋是意圖轉售圖利，就由你
來舉證。」
消基會也指出，現行法規的處罰干焦三工以下拘留抑是罰萬八箍，對共價數炒作到幾十萬
的人來講根本免驚。In希望行政院、立法院攏通參考加重處罰。民進黨立委吳思瑤是表示
，文化部當咧研議修文創法，若民間提供社維法的修法版本嘛真歡迎，會當仝齊進行。