公視新聞網 https://news.pts.org.tw/article/628246
講是農委會壓價數 卵商公會放刁歇市.袂報價
鄭雅文 林郁凱／臺北報導 發布時間：2023-03-20 19:15 更新時間：2023-03-20 19:45
https://www.youtube.com/watch?v=k6I94OTxw_4
有賣卵的業者不滿農委會施壓，毋予價數起起來，這馬也唱講，無排除欲休市。毋過今仔
日農委會主委陳吉仲講，休市是假議題，也呼籲莫閣咧遐放風聲、造成驚惶。
便當內底有國產的肉類、青菜，農委會主委陳吉仲，廿來到庇護工場賣便當，講欲予受物
價影響的消費者也通用６０箍買著營養。
農委會主委陳吉仲表示：「咱對四月開始，絕對是袂閣一禮拜干焦一萬七千外盒，咱欲用
十萬盒以上做目標。」
便當欲提供大都會受物價影響的青年攏通買，只是，卵價近日也有爭議。有卵商講因為農
委會施壓，致使這禮拜的卵價無法度起價，唱聲講無排除欲長期歇市，陳吉仲也無咧軟，
表示歇市是假議題，因為雞卵無親像肉品市場，逐工攏有交易。
農委會主委陳吉仲表示：「逐改攏重演按呢的劇本，對解決問題無幫助，我已經強調，刁
工來炒卵價的議題，干焦會造成驚惶。」
農委會話講甲真重，毋過業者也表示市場已經咧亂喝，對正常交易的人無公平，價數小可
調整較合理，這幾工會拜訪農委會。
中華民國飼雞協會卵雞事業產銷督導委員會執行長陳進丁表示：「問題攏公開，有啥物問
題，逐家會當坐落來講無要緊，莫講講的參做的無仝。」
陳吉仲強調，卵價本底就有議價機制，尊重卵商佮雞農。已經要求所有人員莫接相關電話
，產銷資訊會統一對外說明。伊也進一步表示，佇３月底會有超過７百萬粒專案進口的雞
卵來台灣，四月會閣較濟，加上這馬卵雞數量有提升，相信雞卵的產銷會漸漸恢復正常。