公視新聞網 https://news.pts.org.tw/article/629788
主計總處毋准3土地拄數 臺鐵企工唱欲閣罷工
郭柏均 張育睿 / 台北報導 發布時間：2023-03-29 19:15 更新時間：2023-03-29 19:52
https://www.youtube.com/watch?v=XuBJ63ucY6Q
臺鐵公司化過程閣再出現爭議，台鐵企業工會今仔日表示，行政院主計總處無同意台鐵，
用三塊土地來拄1600億的債務，根本無照當初的協議來行。若按呢台鐵公司一下成立，就
欠一堆數，遮省遐省，一定會影響著鐵路安全。若4/10進前無得著善意的回應，就欲發起
莫加班運動，甚至罷工。(本則標題、導言、內文皆為臺文)
台鐵企業工會29召開臨時理事會，批評政府無照品照行，行政院主計總處，無同意台鐵以
三塊地、來償還1600外億的債務，要求台鐵愛提出閣較濟土地。但是工會指出，這無照當
初時的承諾行，唱聲欲閣發起莫加班運動，甚至罷工。
台鐵企業工會秘書 吳長智表示：「阮無排除開放協商，但是是這馬政府背信。咱台鐵愛
啥物？平安轉厝是王道」
台鐵企業工會理事長 陳世杰表示：「進前佮交通部的協定是，公司掛牌必須愛債務歸零
，若是欲成立償債基金，就是咱進前的共識，就是彼三塊土地去做償債基金。過去政策的
虧損，無應該是未來公司的同仁擔。四月初十進前，若無得著正確、善意的回應，阮就會
共協商大門關起來，發動未來國定假日莫加班。關協商大門了後，阮隨時會啟動(勞資調
解)，會隨時去研議(罷工)」
工會指出，社會對台鐵公司化的期待，是安全、服務、改變體質，才有法度永續發展；若
工會訴求無法度達成，公司拄成立就欠遮濟數，根本無法度確保行車安全。
台鐵企業工會秘書 吳長智表示：「1600億負債佇公司內底，所有的設備、人員、人流，
去做一寡精簡的部份，相對遮的項目來講，絕對安全就會失去焦點。以前咱28年無調整票
價，是配合政府的政策，負債的方向性，要求未來公司償還，其實是真為難的一件代誌」
記者參行政院接接，但是行政院方面並無提出回應。抑若台鐵局是表示，對工會訴求已經
有掌握了解，行政院主計總處也有佇台鐵公司化推動會報內底、提出明確的意見，會繼續
凝聚共識，希望圓滿處理。