公視新聞網 https://news.pts.org.tw/article/631569
老師疑似霸凌害學生行短路 教長:調職.待調查
鄭雅文 林郁凱 /台北報導 發布時間：2023-04-10 19:15 更新時間：2023-04-11 10:44
https://www.youtube.com/watch?v=x3RqAcCTojg
台中前一站仔，有一个高中生，好親像是受著學校的師長霸凌，落尾選擇行短路。教育部
長潘文忠表示，涉案的師長攏已經調離開這間學校等待調查，按算四月中就知結果。有民
間團體和立委就批評講，學校針對老師無適合的行為，這評議的標準有真大的問題，而且
嘛無共in淘汰的機制，應該嘛愛檢討。
民間團體進前公開台中市一間學校發生教師凌勒學生，造成學生自殺身亡的代誌。立法院
教育佮文化委員會初十安排教育部進行專案報告，教育部長潘文忠表示，會用上嚴格的方
式做後續的處理。
教育部長 潘文忠：「目前已經由台中市政府對學校採取專案管理，也組成專案小組，目
前攏咧進行，預計四月中旬左右報告會出來。」
潘文忠佇會前訪問的時強調，專案小組以外聘委員為主，希望客觀公正釐清案件，預計四
月中會有報告。另一方面，立委范雲也佮一寡民間團體召開記者會，表示目前若發生老師
共學生體罰，定定干焦認定是不當管教，老師可能毋知家己的行為已經無適任。
立委 范雲：「上嚴重的只有性平事件，確認的時，較有機會予無適任教師退場，體罰參
凌勒干焦記過、申誡。」
人本教育基金會執行長 馮喬蘭：「咱會使思考這件代誌，咱愛提懸咱佇校園當中對兒童
權益保護的標準，毋是予逐个囡仔去證明伊受傷偌嚴重。」
民間團體指出，這馬淘汰無適任老師的流程，毋但教師無適任的行為無具體判斷標準，連
案件調查進入審議機制，受害者也袂當出聲，遮的問題真離譜。in要求教育部趕緊建立無
適任教師行為的判斷標準，也愛予受害者佇案件審議中講話。