公視新聞網 https://news.pts.org.tw/article/633169
2021臺灣人平均1冬上班2千點鐘 排全球第四
鄭雅文 林郁凱／臺北採訪報導 發布時間：2023-04-20 19:15 更新時間：2023-04-21 10
:03
https://www.youtube.com/watch?v=GoDaohFRFH8
臺灣人一年上班的總工時，佇2021年是2千點鐘，排全球第四名。工時長敢真正才有效率
？前一層仔，英國有做一項研究，發見一禮拜歇三工，上班的效率顛倒較好。有學者是認
為，咱的政府通揣服務業試辦看覓，無定著會予一寡少年人願意去做服務業。
毛先生，做掠龍這途、頭尾差不多十冬，伊講過去、食人的頭路、上下班時間、攏無法度
家己控制，規氣家己出來做。
掠龍師傅毛先生表示：「店頭上班，一定是綁十點鐘上基本的，而且店頭上班，你無參同
事抑是櫃台，共關係拍予好，其實會影響著排班。」
台灣人，一年上班的總工時，佇2021年是2千點鐘，排全球第四名。國家政策研究基金會
，也提出職業災害統計資料，講對2013年到2022，25歲以下、少年人過勞的比例有升懸的
趨勢。尤其到舊年、25歲以下的過勞比例、占欲6%、比往過較懸。有學者認為可能佮真濟
工課、猶是規定責任制、長工時有關係。
國立中央大學法律參政府研究所副教授許雲翔表示：「當責任制工課增加的時，自然毋是
用一般的工時來計算，就是你工課愛完成，少年人佇工課中真容易就超時。」
前一陣，英國有做一項研究，發見一禮拜歇三工，上班的效率顛倒較好，這陣佇台灣的公
共網路參與平台也有人提案，希望台灣成做亞洲頭一个一禮拜歇三工的國家，目前吸引2
千外人表示支持。
勞動條件佮就業平等司副司長王金蓉表示：「伊其實有無仝營運的狀況，勞工也有無仝的
需求，一禮拜歇三工的議題，會當由勞資雙方，照實際的需要做協商。」
國立中央大學法律參政府研究所副教授許雲翔表示：「服務業的部份，無的確會使，服務
業真濟時陣是用輪班的方式，可能本底就有這寡空間佇咧。」
有學者認為，政府無的確會當揣大欠工的服務業試辦，沓沓仔試做，無定著會予一寡少年
人願意去做服務業。一兼二顧。