公視新聞網 https://news.pts.org.tw/article/633680
受少子化.健保給付低影響 兒科醫師嚴重欠額
鄭雅文 謝季潾／臺北採訪報導 發布時間：2023-04-24 19:15 更新時間：2023-04-25 09
:24
https://www.youtube.com/watch?v=xjS7BpOezds
根據臺灣兒科醫學會的統計，這幾冬全臺兒科住院醫師的招聘率，一年比一年猶閣較低，
招袂滇的欠額，一年比一年閣較嚴重。有醫師講，除了這馬囡仔減少，閣有健保給付傷低
，攏是少年醫生無願意踏入這科的原因。
囡仔破病，父母會去小兒科診所，毋過小兒科的患者，大部份的病人，並毋是兒童。醫生
講若干焦看囡仔，一定倒店。
中華民國基層醫療協會理事長林應然表示：「像我看的病人，有一半毋是囡仔，因為我若
干焦看囡仔，我一定倒店。」
少子化，嘛影響醫生無愛去做兒科醫生，致使台灣各大病院揣無兒科醫師，像一向熱門的
台北馬偕兒童病院，7月底前欲揣醫師，到今猶未滿招。根據兒科醫學會的資料，全台兒
科住院醫師招收率，對110年度到今部定容額逐年攏是百三个左右，但招袂滇的欠額、一
年比一年嚴重。
臺灣兒科醫學會秘書長彭純芝表示：「兒童醫療支付設計，袂當閣以量做考量，達成一定
的量，來飼這个病院抑是醫療診所，也愛考慮著，本底愛有的制限佇佗，袂做一个虧一个
。」
有兒科醫師指出，除了少子化、兒童醫療支付偏低也是人無愛做兒科醫生的主要原因。過
去"五大皆空"像內科、兒科、婦產科、外科、急診的、較招袂滇。顛倒皮膚科、眼科、真
濟醫師相爭搶名額，台灣醫療改革基金會煩惱，失去平衡，未來一寡有急重症需求的患者
恐驚揣無醫生。
台灣醫療改革基金會執行長林雅惠表示：「假使未來，有兒童急重症，按呢大量的醫療需
求，像進前新冠肺炎的情形，國內可能的醫療量能，是無法度負擔的，甚至咱可能愛向國
外來求援。」
醫改會就建議政府，愛檢討健保支付的標準，提供誘因予高風險處境的科別。健保署有回
應講，目前健保已經採取總額制度，當咧檢視各科別支付情形，會看兒科需求進一步討論
。