公視新聞網 https://news.pts.org.tw/article/635590
ChatGPT教臺語? 學者當咧開發AI程式拚傳承
郭柏均 林郁凱 / 台北報導 發布時間：2023-05-06 19:15 更新時間：2023-05-06 20:10
https://www.youtube.com/watch?v=giGPjRKJdbg
科技發展速度真緊，進前ChatGPT有法度參人、自然對話，引起逐家、對AI人工智慧的關
注；Meta開發出台語、英語的對譯系統，也予各界留下真深的印象；台灣有學者、進前捌
參與過Meta對譯系統的計畫，伊目前當咧做研究，按算以公視臺語台的節目，做訓練資料
，無定著佇未來，電腦程式、就有可能成做咱的台語老師。(本則新聞標題、導言、內文
皆為臺語文)
記者郭柏均、對鬥陣來開講系統講：「你好、食飽未？」
系統回答：「我是電腦程式，無需要進食，多謝你的關心。」
電腦聽有記者用台語問的問題、通翻譯做英語、也會使用台語回答，其實這是陽明交通大
學廖元甫教授，用家己開發的華語、台語對譯系統，結合ChatGPT，予電腦也有能力參人
、用台語對話。
陽明交通大學智能系統研究所所長廖元甫解釋：「你講臺語，先用阮的程式，先共翻譯做
中文、中文才送去ChatGPT，伊看著中文伊就會曉應，但是伊回答的是中文，阮就閣共伊
翻譯做臺語。」
他閣講：「因為ChatGPT訓練、就是四界去捎資料，尤其是對網路面頂去掠，所以掠落來
的資料大部份攏英文、中文為主，臺文的真少。」
目前欲予電腦聽有台語、用台語對話，因為資料傷少，是目前主要的難關。毋過廖元甫表
示，當咧透過教育部的計畫，參公視臺語台合作，按算以台語台的節目做資料，訓練程式
聽有台語，未來電腦程式就有機會成做人的台語老師、傳承台語。
陽明交通大學智能系統研究所所長廖元甫表示：「（目前)教台語的人較無夠，學生仔家
己欲學(效果)就較，所以上好是用電腦來教。」
伊講，這个(訓練)資料若閣較濟，程式可能就會使應了閣較好。
計劃按算佇四冬內，掠6000點鐘臺語台的節目，整理出3000點鐘的台語語料庫做訓練。廖
元甫做台語程式開發，到今五年左右，伊也捌提供資料，予Meta製作台語、英語對譯系統
；伊認為，這馬電腦技術發展有夠分、閣有國家語言發展法這款政策支持，現此時是復振
本土語言、上好的時機。