公視新聞網 https://news.pts.org.tw/article/636902
臺南欲試辦取消"分2改倒斡" 民眾有無仝見解
李晨宇 / 臺南報導 發布時間：2023-05-15 19:15 更新時間：2023-05-15 19:50
https://www.youtube.com/watch?v=_-L7qwiSwG8
最近臺南的交通受著關注，為著改善車路交通安全，進前交通部針對機車開放一寡路權，
就有提出毋免兩段式倒斡的措施。臺南就有人咧傳講一寡路口欲先試辦。臺南市交通局表
示，目前會先檢討內線車道的安全，才閣來評估、取消兩段式倒斡的可能性。(本篇新聞
標題、導言、內文皆為臺文)
機車騎到雙叉路口 ，若欲倒斡著愛先去待轉區兩段式倒斡，這馬煞傳講台南市交通局欲
取消部份路口機車兩段式倒斡，消息傳出來，嘛引起民眾有無仝意見。
民眾 謝小姐：「按呢會較亂，因為遮攏是學區。」
民眾 侯先生：「待轉區車輛毋是遐爾濟，是會使考慮共伊取消。」
民眾 吳先生：「我是較偏向愛維持待轉區較濟一寡，毋過若講提掉有其他配套措施，我
嘛袂反對。」
臺南市平常日佮和歇睏日，車輛攏洘洘洘。尤其是舊城區，古早時就發展，路身較狹，閣
無法度楦路，和騎車嘛歹騎。臺南市交通局就講，目前配合交通部的要求，先檢討內爿車
道的安全，機車紲落來嘛會看欲改進的路段有偌濟，才閣來進一步評估取消兩段式倒斡的
可能性。
臺南市交通局智慧交安科長 黃柏彰：「這馬當咧進行單向兩車道，一个快(車道) 一个混
(路段)的盤點作業。遮是按算有路邊停車的格位，臨停干擾嚴重程度較懸的舊城區，嘛是
咱原本的府城地區，開始欲來優先試辦推。」
若取消，機車參汽車摻雜做伙，機車直接倒斡時，會和對面車輛發生衝突；若保持原本按
呢，是以車種分流，來避免汽機車相挵。交通局表示，目前初步先掠路口大細佮參詳欲佇
佗先試做，未來嘛會邀請相關單位和台南市道安委員逐家做伙討論，會勘了後才做確定，
若欲實施進前嘛會提早向鄉親宣傳。