公視新聞網 https://news.pts.org.tw/article/636901
勞動部調查 干焦15%勞工佮意踮厝上班
鄭雅文 莊浚佑 / 臺北報導 發布時間：2023-05-15 19:15 更新時間：2023-05-16 14:00
https://www.youtube.com/watch?v=kl2hqATGS9A
疫情穩定、漸漸轉去往過的生活，抑若疫情期間，真濟勞工改踮厝上班，到底，是好抑是
禾黑？勞動部最近有發佈一份研究，調查、踮厝內上班對勞工健康影響的調查。發見佮意
踮厝上班的人、只有15%、特別是職業婦女，上無佮意踮厝上班，顛倒踮公司上班、比較
較自由。(本篇新聞標題、導言、內文皆是臺文)
進前疫情期間，真濟公司為著避免接觸，安排員工踮厝上班，視訊開會這款畫面是真四常
。這陣疫情轉和，漸漸仔恢復往過的生活，勞動部有做一份調查，反頭來問勞工，敢有佮
意踮厝內上班？結果顯示佮意踮厝上班、作穡的人、干焦一成五爾爾。
勞動部勞動佮職業安全衛生研究所副研究員 徐雅媛：「阮家己問逐家的意見，發見大概
只有15.6%左右佮意踮厝辦公。猶毋過阮發見四成左右的員工是感覺講，若真正愛踮厝(上
班)也會使，猶毋過就是當做輔助。」
勞動職業安全衛生研究所，舊年4月到12月，有做一份疫情時期踮厝辦公的研究報告，發
見有四成的人，較愛佇辦公室上班。尤其是女性踮厝內上班的心理壓力、比男性較大，尤
其是40歲到59歲之間，有佮厝內人蹛做伙，抑是需要顧囡仔的，家庭衝突的分數嘛較懸。
民眾：「因為媽媽踮厝閣愛顧囝、閣愛摒掃，然後閣愛上班，其實代誌足濟。」
毋過也是有民眾較佮意踮厝上班，認為睡眠時間、生活型態、攏通家己調整。
民眾：「我的感覺是遠距離辦公較自由，會當佇厝裡做家己的代誌，順紲分配家己的時間
，我不止仔佮意。」
勞安所表示，踮厝上班，勞工的心理健康、睏眠、食食敢有正常、上班環境如何，嘛需要
關心。會做這份報告，主要就是欲預防、未來準講閣需要改踮厝內辦公，政府就通參考這
个報告，來提出建議佮政策。