公視新聞網 https://news.pts.org.tw/article/637295
人權遊臺灣巡演 "開在壁上的花"講受難者故事
郭柏均 林郁凱 / 臺北報導 發布時間：2023-05-17 19:15 更新時間：2023-05-17 19:50
https://www.youtube.com/watch?v=hvxkPFnh5XI
臺灣佇白色恐怖時期，有濟濟政治受難者，背後攏有使人心痛的故事。臺灣有劇團，長期
攏咧以政治受難者的性命故事做主題、創作舞台劇。今年推出舞台劇「開在壁上的花」(
開佇壁頂的花)，搬演三个白色恐怖、政治受難者的故事。(本篇新聞標題、導言、內文皆
為臺文)
隔一堵壁，一爿是好額人、一爿是散食人，這是劇團以政治受難者簡國賢的舞台劇「壁」
、佮作家楊逵的創作「硩袂扁的玫瑰」發想，創作的舞台劇「開在壁上的花」。
海導演劇團長 林志遠：「抑毋過按呢的咱的社會敢有公平？所以伊想欲共這沿壁拍予破
，去予國民政府看著了後，伊這齣戲本來欲閣加演，煞去予人禁止。雖然咱經過遮爾濟年
矣，這个壁可能猶閣佇遐，咱猶無法度去共拍予破，但是足濟人佇咧拍拚，壁頂已經開真
濟花矣。」
「開在壁上的花」以白色恐怖時期，楊國宇、簡國賢、林秋祥三个踮佇桃園的政治受難者
為主題，講白色恐怖的故事。
政治受難者 楊國宇：「今仔日逐家會當生活遮爾自由、民主，毋是天落落來的，確實是
足濟人流血的。」
海島演劇團長 林志遠：「桃園有足濟案件，咱今仔日揀的這三項，不管是互相的關係也
好、蹛佇厝邊也好，抑是甚至伊的案件攏是互相有牽連。」
海島演劇團、長期以政治受難者的故事為主題，創作舞台劇。「開在壁上的花」(口唸「
開佇壁頂的花」)，是「人權遊台灣」巡演計畫、當中的第五齣，按算5月份、佇5个縣市
、舉辦6場的演出。