公視新聞網 https://news.pts.org.tw/article/637987
南市推智慧停車 擴大設置停車柱、用APP揣車位
李晨宇 / 臺南報導 發布時間：2023-05-22 19:15 更新時間：2023-05-23 09:01
https://www.youtube.com/watch?v=ennx5-VZ82w
對駛車的人來講，上頭痛的問題、就是停車問題。臺南市政府是全台第一个、推動智慧化
路邊停車的服務，目前有一萬一千閣，覆蓋率已經有78%。市府表示，明年欲衝到九成。
另外，嘛推出臺南好停車的APP，予民眾會使隨掌握、停車格仔的資訊。(本篇新聞標題、
導言、內文皆為臺文)
一支一支的智慧停車柱，佇臺南市區濟濟所在攏看會著。臺南市交通局為著欲予民眾閣較
好停車，引進智慧停車柱，方便民眾馬上就納停車費，另外嘛佇一般的停車位埋地磁，掌
握停車格使用情形。交通局講，設停車柱嘛會當彌補收費人員無夠的問題。
臺南市交通局簡任技正 黃俊傑：「伊會使提供現場隨時的納數，嘛會使提供即時車位的
查詢。到目前為止全臺南市有四千支，遮全國規模上大、數量嘛上濟。」
臺南市全市有一萬四千个停車格，交通局對108年開始推動，目前智慧停車柱和地磁的數
量，攏總有一萬一千个。交通局表示，覆蓋率已經完成百分之78，目標欲佇明年完成九成
。雖罔建置的數量是全國上濟，毋過，民眾煞有無仝的看法。
民眾 鄭先生：「按呢來講是較方便。」
民眾 楊先生：「研究半點鐘，我才發現伊是需要悠遊卡，問題毋是每一个人攏有辦悠遊
卡。」
臺南市交通局簡任技正 黃俊傑：「無一卡通、悠遊卡、無方便佇現場使用Line Pay，事
實上直接共車開走，仝款會使到超商去補單。」
揣停車位定定愛開真濟時間，交通局嘛推出臺南好停車的APP，內底會使查著佗位有空的
停車格，嘛會使掌握著離你上近的公民營停車場，節省民眾揣停車位的時間。