公視新聞網 https://news.pts.org.tw/article/641761
新竹母語社團辦活動 tshuā母語家庭起造遊樂場
張君豪 /新竹報導 發布時間：2023-06-15 19:15 更新時間：2023-06-15 19:53
https://www.youtube.com/watch?v=p7mhMCVlgwk
大自然就是上讚的教室，佇新竹的母語家庭，佇大自然當中，透過天然的竹仔、柴箍佮索
仔，教囡仔家己創造出上天然、上環保的遊戲場，囡仔閣會使那耍那學台語。（此則新聞
標題、導言、內文皆為臺語文。）
囡仔佇用竹仔做的遊戲場，peh過來幌過去，另外一爿是佇家己挖的水池，耍甲有夠歡喜
。閣有囡仔利用竹仔，透過大人的指導，家己搭起一座便橋，實在真厲害。
囡仔：「因為我看著有竹仔，就想講來托去對面，就會當過去，（感覺有趣味好耍)？嗯
。」
囡仔：「非常好耍（按怎講？佗位好耍？)因為阮有起這座橋，會當peh過去耍，而且閣會
使鑽水窟仔
微光農園負責人 郭文祺表示：「其實囡仔愛佇tshit迌環境內底，開始會當做風險評估，
你若是無予囡仔去學，囡仔後擺就袂曉，干焦會佇安全的所在去tshit迌，其實有當時顛倒
會受傷。」
新竹母語團體想欲予囝仔，加接觸大自然，特別tshuā囡仔來外口，利用自然環境中的工
具，打造出大自然遊樂場，逐家那耍、那講台語，紹介耍法、提醒注意安全、全程攏講台
語。
新竹母語推廣協會秘書長 翁靖宜表示：「不管是進行遊戲，抑是有一寡危險的動作，嘛
是會共伊適當提醒，閣會共囡仔提醒講，咱這馬佇遮，譬如講咱愛講台語，抑是咱愛講客
語，抑是講等等的語言 ，所以佇遮這个環境是足自由的。」
教囡仔功夫、家己搭遊樂場，毋但囡仔愛耍、就連大人嘛感覺真趣味。接觸大自然，予囡
仔佇生活中有無仝款的刺激，逐家同齊講台語，嘛是替囡仔創造閣較多元的母語環境。