公視新聞網 https://news.pts.org.tw/article/645347
今日上熱佇臺北社仔38.6度 初九猶原燒烘烘
郭柏均 張育睿 / 台北報導 發布時間：2023-07-08 19:15 更新時間：2023-07-08 19:43
https://www.youtube.com/watch?v=8QoKbuohCH8
最近天氣有夠燒熱，初八全台上懸溫度，出現咧臺北市社仔，有38.6度；因為太平洋高壓
佮西南風的焦熱空氣，初九仝款會是燒熱的天氣。另外根據美國國家預測中心的資料，初
六全球平均溫度有17.23度，是1979年以來上懸的，甚至有科學家認為，這陣可能是10萬
年以來上熱的時陣。(這則新聞標題、前言、內文為臺語文。)
日頭赤炎炎，真濟人咧耍水解熱。根據中央氣象局的資料，初8全台上高溫，出現佇台北
市的社仔，有38.6度。氣象局表示，因為太平洋高壓，加上吹西南風、帶來焦熱的空氣，
全台會熱到初九。
中央氣象局預報員趙竑講：「明仔載各地普遍來到33到37度，仝款佇大臺北盆地、中南部
倚山區、花東縱谷，愛注意溫度可能會閣懸1到2度。拜一以後水氣較濟，西南風也小可減
弱，各地雖然高溫猶有32到35度左右，毋過36度高溫以上的地區，區域範圍也較細。」
毋但台灣燒熱，根據外國媒體CNN報導，對美國國家預測中心的數據發現，初六全球平均
溫度是17.23度，創下1979年以來上懸的紀錄；甚至有科學家認為，這禮拜的氣溫，可能
是10萬年以來、上熱的一个禮拜。氣象局認為，原因真複雜，可能愛等規季的資料出爐，
才通知影。
中央氣象局預報員趙竑表示：「佇較大範圍的環境之下，除了區域性的溫度，猶有規个大
氣環流的配置，攏會影響佇今年各地溫度分佈。原因猶是愛等以後，所有的資料較齊全的
時陣，才有法度為逐家分析結果，猶有原因是啥。」
燒熱的天氣猶會繼續，氣象局提醒，愛避免無必要的戶外活動，也愛注意序大、囡仔、脆
弱族群、佮戶外工作者的身體狀況。另外佇咧閃風面的地區，可能會有火燒風，會使使用
防風設施佮噴水，避免農作物損害。
張曼亭/編輯