公視新聞網 https://news.pts.org.tw/article/648975
文化部創新冊市計畫 邀請民眾踏入實體冊店
郭柏均 張育睿 / 台北報導 發布時間：2023-07-31 19:15 更新時間：2023-08-01 09:03
https://www.youtube.com/watch?v=P358zNfXs5w
文化部推出創新冊市計畫，欲參各實體冊店合作，佇台灣各地頭舉辦藝文活動，望民眾行
入實體冊店。業者表示，文化部推出成年禮金、文化幣政策，有增加少年人到實體冊店買
冊的意願，但是佇網路冊店的價數競爭之下，上好愛有新冊價數規範，予實體冊店有較好
生存的機會。（此則新聞標題、導言、內文皆為臺語文。）
一本一本的冊，每一本內底，攏是豐富的世界，你有偌久無行入實體冊店買冊矣？度過疫
情，文化部辦創新冊市計畫，參各地冊店、出版社等等單位合作，對今年7月到明年5月，
佇各地頭辦成百場的冊市、藝文活動，望逐家通閣一擺行入冊店。
文化部長史哲表示﹔按怎長期經營，16歲到22歲的讀冊慣勢，我個人認為這也牽連著整體
，未來獨立冊店也好、閱讀慣勢培養也好，甚至講較嚴重咧，也牽涉規个出版業。
獨立冊店業者表示，現此時、並疫情期間，人潮有增加三成左右；這陣也發見因為文化部
推出成年禮金的文化幣政策，行入冊店的少年人變濟，有加四成左右。毋過佇網路冊店的
價數競爭之下，實體冊店猶是歹經營，閣較免講是獨立冊店，狀況愈害。
獨立書店文化協會理事長廖英良說明﹔阮毋是欲共網路冊店的人客，來實體冊店，其實
每一个人有每一个人，買物件的習慣，圖書統一訂這件代誌，就是講咱新冊拄出版的時陣
，你會當莫拍遐濟折，予原本習慣咧實體店，伊較佮意實體店的人，伊會當無啥物感覺，
為著彼个價數佇遐咧礙虐，感覺佇你遮買冊，感若去予人貴去。
獨立書店文化協會表示，除了希望建立新冊售價規範、通予實體冊店較好生存，也望這馬
的文化幣政策，通常態化、久長執行，透過鼓勵少年人閱讀、慣勢買冊、讀冊，按呢生實
體冊店就會較好經營。
洪家馨/編輯