公視新聞網 https://news.pts.org.tw/article/655100
牽成陳盈潔、王瑞霞 臺語詞曲家蔡一州破病過身
郭柏均 張育睿 / 台北報導 發布時間：2023-09-06 19:15 更新時間：2023-09-07 08:36
https://www.youtube.com/watch?v=ncxZT71LNbQ
臺語作詞作曲家-蔡一州佇9/3因為破病過往，食過65歲。伊寫過真濟好聽的歌曲，親像「
必巡的空喙」、「東石港的戀歌」。伊在生進前也有接受公視臺語台的專訪，咱也作伙佇
9/11「心所愛的歌」這个節目，來懷念蔡老師。（此則新聞標題、導言、內文皆為臺語文
。）
「東石港的戀歌，懷念的東石港，愛人仔的形影」故鄉的風景、唱出心情，這條東石港的
戀歌，是詞曲家蔡一州寫的，佇公視的節目家己唱。寫過濟濟臺語歌的蔡一州、9月初3，
因為疾病過身，食到65歲。
陳盈潔唱必巡的空喙，必巡的空喙，是永遠抹袂平，這條《必巡的空喙》，是蔡一州為歌
手陳盈潔寫的，而且是寫出愛人仔放sat伊的艱苦。
作詞作曲家蔡一州，「這欲按怎，你愛寫伊這種心境的歌，必巡的空喙，共改作男女之間
的感情。」
「王瑞霞唱風塵淚，較早我是燒酒無半滴」
蔡一州通人知的作品，閣有1989年寫予女歌手王瑞霞的《風塵淚》、也是彼時的布袋戲主
題曲。
女歌手王瑞霞，「草地囡仔無足濟好的環境，予伊學唱歌嘛，總是彈一个吉他，練歌、唱
歌，對這个音樂當中去揣著伊的夢想」
蔡一州佇東石漁港出世，為著讀冊、閣有完成家己的音樂夢想，16歲就離開故鄉，就算種
過田、做過工仔、嘛無放棄音樂。一直到拄著歌手蔡振南了後，才出頭一張唱片。
作詞作曲家蔡一州講，「結果我就去蹛in兜，蹛in兜伊佇遐閒閒罔彈，我就下班轉來，我
看伊彈，我講，大的你共我教寫歌。」
中年以後的蔡一州，健康狀況無蓋好，生活重心對音樂創作，變到社區教人唱歌。蔡一州
為音樂拍拚一世人，公視臺語台佇11，也會播出過去伊的訪談，tshua逐家做伙數念蔡一
州。
剖蚵仔所唱的彼條戀歌。
洪家馨/編輯