公視新聞網 https://news.pts.org.tw/article/661161
臺南「文資月」活動 體驗抽藥籤、認捌宮廟文化
李晨宇 / 臺南採訪報導 發布時間：2023-10-10 19:15 更新時間：2023-10-10 19:48
https://www.youtube.com/watch?v=MBM5fs2Lqj4
十月是臺南文資月，臺南市文資處辦濟濟活動。包含予民眾了解逐間廟寺的歷史，嘛實際
體驗抽藥籤。興濟宮表示in廟裡的藥籤目前已經有360首，創下全國保生大帝廟最多藥籤
的紀錄。（此則新聞標題、導言、內文皆為臺語文。）
每一个學員手提學習單，那聽導覽員講解，那走揣任務的答案。每一間宮廟就若親像博物
館，為著欲予民眾充分來學習，台南市文資處運用北區公所參清華大學所開發的教案，佇
祀典興濟宮辦現地教學的課程，除了tshuā學員認捌歷史悠久的牌匾、門神佮壁堵，另外
嘛予in實際體驗抽藥籤的文化。
參與民眾
文資處辦這个活動會使予專業的人
來tshuā囡仔會使用閣較深入的角度來看
臺南市文資處文物管理及行政組組員 陳軒儀
透過場域的互動
然後你會使真正去親近in熟似
透過較活潑的數位體驗
予恁會使重新去了解
過去捌是啥物脈絡按怎來的
先向大道公稟報了後，手囥咧案桌用香節脈，落尾才開始抽籤，就愛三个象桮才準算，這
就是抽藥籤的過程，這項傳統文化到今上百冬。廟方表示，傳統藥籤干焦330首。在地中
醫師高國欽發覺現代有真濟文明病，伊用十冬去研究收集，閣跋桮請示，落尾替廟加增加
30首，嘛彌補這百冬來藥籤文化的斷層。
府城觀興文化藝術基金會理事兼董事 許忠欽
百姓對宗教信仰除了精神上以外
辛苦病疼嘛是會來揣保生大帝
咱保生大帝拄仔好是醫神
所以對醫藥的方面嘛是真內行
俗語講，也著神也著人。廟方提供抽藥籤的服務，予民眾會當心安，毋過嘛有建議講，身
體若是有各樣嘛是愛揣醫生較妥當。文資處佇文資月辦一系列趣味閣輕鬆的活動，in向望
予民眾用無仝的角度來看本土文化的面貌。
洪家馨/編輯