公視新聞網 https://news.pts.org.tw/article/661814
第17屆金掌獎 嘉義"五洲勝義閣'提最佳團體獎
郭柏均 林郁凱 / 台北報導 發布時間：2023-10-14 19:15 更新時間：2023-10-14 19:47
https://www.youtube.com/watch?v=ZRLlgi-AXs8
布袋戲界的大獎「金掌獎」，今年已經行到第17屆，頒獎典禮佇14下晡舉辦。上大獎「最
佳表演團體獎」，是由來自嘉義的「五洲勝義閣掌中劇團」著獎。主辦金掌獎的雲林縣政
府表示，為著希望布袋戲通代代流傳，現此時金掌獎也當咧做改變，希望毋但鼓勵濟濟布
袋戲界的前輩，也通吸引少年輩加入傳承。(這則新聞標題、前言、內文為臺語文。)
《諸羅傳奇-虎爺收契囝》以傳統布袋戲、結合現代化燈光效果，行出新的風格，五洲勝
義閣掌中劇團以《諸羅傳奇-虎爺收契囝》，得著今年「金掌獎」的「最佳表演團體獎」
。
五洲勝義閣掌中劇團團長曾民光講：「雲林金掌不可斷，掌中藝術永流傳。」
短短兩句聯，講出布袋戲繼續流傳的向望。若講著少年輩，今年的「最佳口白藝術獎」是
由常勝軍「昇平五洲園」著獎，代表領獎的，是劇團第三代少年輩藝師，伊講，現此時有
濟濟少年輩當咧徛佇傳統、行出布袋戲新的路。
昇平五洲園第三代林瑞騰講：「布袋戲會當加入真濟元素咧內底，光雕、沙畫、後景、甚
至是咱的舞台攏會使改變，就無像傳統的布景式的舞台；改變當中嘛愛保留傳統的部份，
一定愛用傳統尪仔、主演的口白一定愛一个人講，因為布袋戲上主要就是咱五音分明。」
由布袋戲故鄉雲林、主辦的金掌獎，已經行到第17屆。雲林縣政府講，為著予布袋戲通代
代流傳，金掌獎也當咧改變。
雲林縣政府文化觀光處處長陳璧君講：「以早就是大金掌；為著欲予40歲以下的少年藝師
也通予人看見，所以咱也開始有青年金掌、小金掌。對這个舞台會當看著，傳統布袋戲已
經無仝款矣。」
縣政府講，這个獎毋但鼓勵自本就佇布袋戲界拍拚的老藝師，也通提供少年輩一个舞台、
招閣較濟人加入；透過多元素的結合推廣，予民眾繼續重視布袋戲藝術。
張曼亭/編輯