公視新聞網 https://news.pts.org.tw/article/661877
蔣渭水台客語漢詩吟唱賽 決賽指定〈意難忘〉
呂尚儒 莊浚佑 / 臺北報導 發布時間：2023-10-15 19:15 更新時間：2023-10-16 10:28
https://www.youtube.com/watch?v=wpMx1ewV-G4
為著欲加強母語傳承佮吟唱藝術，義美文教基金會已經連紲3年主辦「蔣渭水台語客語漢
詩吟唱賽」，20位選手今仔日決賽拚懸低，指定吟唱4首臺灣漢詩，其中就包括雙十大典
當中，藝人楊烈所吟唱的〈意難忘〉，咱嘛做伙去聽看覓。（這條新聞導言、標題、內文
是台語文。）
參賽選手 黃炫尊：「世間未許權存在，勇士當為義鬥爭。」
「蔣渭水台語．客語漢詩吟唱賽」，20位選手佇15的決賽拚懸低，指定吟唱四首臺灣漢詩
，其中也包括雙十大典當中，楊烈所吟唱的「意難忘」。主辦單位指定本土漢詩來比賽，
嘛是希望選手深入了解臺灣文學，嘛通知影先賢寫作的背景。比賽著等的選手嘛認為，有
機會了解臺灣史是真好的學習。
參賽選手 林東諺：「舊年的時陣我提第三名，我感覺我只是共伊的音唸予準爾。但是今
年我開始有去了解遐的作者的故事，因為歷史毋但是講故事爾。」
參賽選手 蕭宴煊：「咱會當用參加比賽的這个代誌，來了解進前的人，伊寫的彼寡詩詞
是啥物款的意思，嘛會當閣較了解彼當時的人想法是按怎。」
一向關注文學、推廣漢詩吟唱的立法院長游錫堃也當場吟唱家己的作品"淬鍊"，這个作品
就是咧描寫臺灣的歷史和民主化的過程，所經歷的創傷，也磨練出臺灣人的韌性。
立法院長 游錫堃：「兩蔣威權血淚滂，淬鍊臺人堅韌志，奮爭民主傲華疆。」
漢詩吟唱賽第一名就有獎學金20萬，是歷來相關比賽活動當中獎金上濟的，主辦單位嘛希
望比賽會當一年一年辦落去，予愈濟少年家參與，毋但共母語講予好，深入了解詩詞的歷
史背景，嘛是文化釘根真重要的一部份。
陳稷安/編輯