公視新聞網 https://news.pts.org.tw/article/665114
廉政形象使人印象深 陳定南過身17年紀念展
郭柏均 林郁凱 林敬倫 / 綜合報導 發布時間：2023-11-04 19:15 更新時間：2023-11-
04 19:46
https://www.youtube.com/watch?v=uJrsaOfrtQM
過身17年的前法務部長陳定南，做過宜蘭縣長、閣有立法委員，因為伊清廉、反烏金的形
象，閣予人號做「陳青天」。伊1994年捌選過台灣省長，雖然無當選，但是予人認為、是
台灣民主歷史的重要過程。現此時陳定南參選台灣省長的歷史資料，當咧陳定南紀念園區
展出，觀眾作伙來感受彼時的氣氛。(這則新聞標題、前言、內文為臺語文。)
重現前法務部長陳定南1994年，代表民進黨參選台灣省長的模樣。陳定南過身17年，伊彼
時參選省長的歷史文件，現此時當咧宜蘭陳定南紀念園區展出；當時咧做陳定南幕僚的行
政院副院長鄭文燦，也出席展覽開幕現場。
行政院副院長鄭文燦回想：「地方有派系佮烏金，所以陳定南其實是面對，彼个無可能的
任務，咧拍這場戰爭。四界攏絞起陳青天的螺仔風，彼場選舉雖然無成功，嘛是奠定後來
2000年，政黨輪替的基礎。」
陳定南1943年，佇宜蘭出世，做過兩屆宜蘭縣長、四屆立法委員、閣有五年的法務部長；
因為清廉、反賄選佮烏金的形象，選牢宜蘭縣長，閣予人號做「陳青天」。
陳定南教育基金會董事長林光義講：「彼時阮主張無贊成縣長收紅包，阮無贊成現場炒地
皮，阮無贊成，認為袂使是按呢；這个真受關注，落尾陳定南猶是贏矣。」
1994年陳定南選省長的時，喝出「四百年來第一戰，欲共台灣變青天」的口號，雖然無當
選，但是予人認為是台灣民主歷史的重要過程。陳定南基金會希望透過這个展覽，予台灣
人知影實踐民主自由權利的重要性。
張曼亭/編輯