公視新聞網 https://news.pts.org.tw/article/671251
亞洲影藝創意大獎 「海之岸」導演柯金源著獎
呂尚儒 謝季潾 / 臺北報導
發布時間：2023-12-13 19:15 更新時間：2023-12-14 08:33
https://www.youtube.com/watch?v=3H60Grooc9E
2023亞洲影藝創意大獎佇12/7頒獎，公共電視導演-柯金源以探討海岸保護的紀錄片「海
之岸」提著非劇情類的最佳導演獎，這是臺灣頭一改有導演提著這个獎。這个紀錄片結合
真濟舞者同齊做田野，親身去了解咱的海岸搪著啥物款的危機和破壞，用肢體表演和環境
對話，這个創新的表現形態，誠影目，也受著國際的評審肯定。（此則新聞標題、導言、
內文皆為臺語文。）
臺灣公共電視的導演柯金源，佇咧2023年亞洲影藝創意大獎當中，以紀錄片「海之岸」提
著「非劇情類最佳導演獎」。海之岸這部紀錄片，對新北淡水翕到臺東南田，計共10搭的
海岸，記錄無仝海口所拄搪的種種威脅，包括工程開發、工業區汙染、過度遊樂等等，這
改嘛是頭一改有臺灣的導演提著這个獎。
公視紀錄片導演柯金源表示，「感謝評審佮主辦單位，予島嶼國家共同拄搪的，海岸問題
予人看著，期待咱這代人會當有智慧，共同解決海岸的問題，多謝逐家。」
非劇情類最佳導演獎競爭誠激烈，柯金源的競爭對手有濟濟知名導演包括韓國導演張浩基
、澳洲導演Rachel Perkins等等。柯金源導演表示，這部記錄片「海之岸」，攝影團隊和
濟濟舞者同齊做田野，親身去了解、感受臺灣的海岸，用舞蹈、肢體表演和環境對話，這
和往過的紀錄片有真大的無仝，柯金源表示創新嘛是紀錄片的趨勢。
公視紀錄片導演柯金源強調，「逐家攏有一直咧思考，閣來下一步是欲按怎去表現，欲按
怎佮新的少年人來溝通，國際上嘛是仝款，伊一直用兩種角度咧看紀錄片，一个是你的觀
點，你有新的觀點無，第二个是你有創新的形式無，所以咱若欲佇臺灣抑是和國際交流，
就是愛有遮的新的形式佮創意佇內底。」
柯金源導演用影像記錄臺灣環境變遷已經有30外年，「海之岸」是伊第33部紀錄片。臺灣
的自然環境佇遮濟年中間，拄搪濟濟危機和破壞，伊攏用鏡頭記錄落來。這30外年，伊關
心的代誌攏仝款，毋過伊也強調無仝時代愛用無仝方式和外界溝通，伊嘛相信只要繼續講
落去，咱就會有機會會當改變現狀。
洪家馨/編輯