公視新聞網 https://news.pts.org.tw/article/671750
臺客語漢詩吟唱比賽 各地學生互相比並交流
郭柏均 張育睿 / 新北報導
發布時間：2023-12-16 19:15 更新時間：2023-12-16 19:50
https://www.youtube.com/watch?v=SU0x6sKdT-w
由國立臺灣圖書館舉辦的臺語、客語漢詩吟唱比賽，佇16下晡舉辦，有來自全台各地的學
生參與。館方希望透過吟詩，通共母語文化釘根佇校園；就有學生講，雖然家己臺語猶講
了袂輾轉，但是因為對臺語真有興趣，就來報名比賽、練臺語。(這則新聞標題、前言、
內文為臺語文。)
台中高中生參賽者王思詒吟詩：「祇緣羞作馬牛生」
佇台頂，用臺語吟詩，這是國立臺灣圖書館舉辦的臺語、客語漢詩吟唱比賽，有來自全台
各地的學生參與。現此時少年人較少講臺語，有參賽者講，雖然家己臺語講了袂輾轉，但
是望透過參加比賽、練臺語，增加家己的語言能力。
來自台中的高中生參賽者王思詒分享：「祇緣羞作馬牛生的『緣』。我就可能無啥念有到
位；猶閣有唱的部份是彼个，春草遐、春草明年綠的『草』，愛足懸音的。」
來自台北的高中生參賽者廖語芊也分享：「我進前有接觸過蔣渭水的臺語吟詩比賽，這个
比賽我參加了後，感覺對臺語的吟唱，是真有興趣，也非常想欲推廣臺語文化。」
館方表示，配合國家語言發展法、參文化部鬥陣推廣母語，佇舉辦這个比賽進前，也
辦過臺語吟詩的研習營、展覽，以多元方向來推廣母語。
國立臺灣圖書館館長曹翠英：「歌、會當影響生活，伊代表的是一種文化力量的傳承，有
感染力的，吟詩、唱遊、抑者是以歌的方式來傳達，會閣較有效、直接。」
館方表示，這擺國小、國中、高中三組，計共64个比賽名額，一開放就隨搶了了，甚至閣
有來自花蓮、台東、屏東的囡仔上北參與，對報名狀況來看，以吟唱歌詩來推廣母語，學
生反應真好；望透過這款方式，通共本土語言的文化、釘根佇校園當中。
張曼亭/編輯