公視新聞網 https://news.pts.org.tw/article/672767
日本企業進駐高雄唌人陣 新堀江望轉型拚復興
鍾依憓 邱紹揚／高雄報導
發布時間：2023-12-22 19:15 更新時間：2023-12-22 19:38
https://www.youtube.com/watch?v=8I-kDCAVcuU
過去予人號做南部西門町的高雄新崛江，因為這馬消費型態轉變，漸漸咧稀微，雖然講這
個月有2間日本企業，佇附近的百貨咧開，加減帶動人潮，毋過地方猶是希望政府會當重
視，予新崛江恢復過去的光景。
來到高雄的這間百貨，今仔日是平常時仔，外口仝款有人排隊，人陣是插插插，鏡頭徙到
隔壁的新堀江，商圈店面貼欲出租的廣告，人陣是減真濟。
販仔表示：「大概差十幾倍，較早人客真濟。」
民眾表示：「較早是感覺人足濟，這馬較少矣。」
這个月，有兩間日本企業進駐佇百貨公司，百貨公關表示，來踅百貨公司的人陣有加三成
。加減有帶動邊仔新堀江的商機，加上市府為著欲活化商圈，有規劃活動，攤商表示，愈
接近年底，活動變濟，人陣確實有沓沓仔轉來。
販仔表示：「欲到聖誕節有活動，我感覺人陣袂bai2，無親像較早遐爾稀微。」
過去人講北部有西門町，南部有新堀江，商圈理事長表示，往過攤商上濟有到260攤，這
馬賰150間爾爾，佇新堀江經營三十幾年的攤商表示，這馬佮過去繁榮時期，已經無法度
比。
新堀江商圈理事長楊翔茗表示：「目前業績，無像較早 差不多五分之一爾爾。」
除了商圈徙到北高雄，閣有受疫情影響，袂少業者做袂落去收擔，而且辦活動、人陣只是
一時的，地方猶是向望政府會當重視。
高雄市政府經濟發展局主任秘書陳怡良表示：「阮逐年攏有針對商圈，提供行銷抑是硬體
編列補助費用。」
面對新堀江這馬的狀況，經發局回應講，市府每冬攏有經費，商圈業者攏會當申請，來針
對硬體、軟體的設施做改善，經發局嘛講會繼續佇中央公園舉辦市集活動，向望新堀江會
當恢復過去的光景。
陳玟芯/編輯