對學生無較好
因為分班毋是照品行
對學校較好
好教
我是幾十年前讀國中的
佇台北市大安區
一年拄入去是s型分班
二年開始英文佮數學分班
三年就規个分開矣
所以我佮89仝班二年
我所拄著的89
這馬共想想下
大部分攏是厝內無咧管的
確實是階級複製
阮班上準的彼个
我印象足深
因為有一擺伊身分證予阮看
頂懸寫江蘇無錫
我想講哪會佮我寫台北市無仝款
伊畢業了後無閣讀書
佮正式教育系統脫離
就一直犯案一直夆關
最後死佇外國
另外一个嘛是老兵的囝
佮怹老爸嘛差真濟歲
怹老母台灣人
學歷無懸毋過攏有咧共關心
這个就行正途
畢業去讀士官學校
這陣嘛滿20年退休矣
有某有囝
攏猶有咧聯絡
平平89
有的品行嘛正常
只是袂曉讀書有自卑感所以自我放棄
啊有的成績較好的
嘛是足甕肚
重點是
有人關心佮無人管
差足濟
國中三年這段時間對一个人足重要的
愛盡量共救
猶有希望
千萬毋通閣用威權時代的思想欲硬壓
你加共關心
予伊感覺家己無予社會放棄
佮正式社會系統猶維持關係
攏猶有機會
救一个算一个