公視新聞網 https://news.pts.org.tw/article/674568
一生為歌仔戲 楊麗花登錄做北市文資保存者
郭柏均 張育睿 王興中 / 台北報導
發布時間：2024-01-03 19:15 更新時間：2024-01-03 19:35
https://www.youtube.com/watch?v=uu0zmyCkpec
臺北市文化局昨昏依照無形文化資產審議結果，共歌仔戲演員-楊麗花登錄做傳統表演藝
術-「歌仔戲」的保存者。文化局表示，楊麗花是歌仔戲的代表性人物，對歌仔戲貢獻真
大。（此則新聞標題、導言、內文皆為臺語文。）
楊麗花 歌仔戲
聽著這段逐个人攏熟似的聲音，就知影歌仔戲國寶楊麗花來矣。楊麗花的爸母攏是歌仔戲
演員，所以伊的搬戲人生自細漢就開始，對野台戲開始、到內台戲、落尾進入通人知的電
視台，楊麗花成做出名人物。楊麗花注心歌仔戲70幾年，除了演出、也牽教後輩，甚至共
歌仔戲推廣到海外，對歌仔戲貢獻真大，台北市文化局也共楊麗花登錄做傳統表演藝術歌
仔戲保存者。
台北市文化局副局長 陳譽馨
伊(楊麗花)經歷過內外台
閣有電台 電視 閣有電影的磨練
會使講是臺灣非常出名
的歌仔戲代表性人物
也培養非常濟後輩
佇舊年5月底，公視、台視、國家影視聽中心共同製作的楊麗花紀錄片開鏡，踮咧伊身軀
邊的，是伊的徒弟，也是台灣出名歌仔戲演員陳亞蘭。陳亞蘭捌講，楊麗花是伊的恩師，
伊真佩服楊麗花、用青春歲月傳承歌仔戲的精神。
陳亞蘭歌仔戲團長 陳亞蘭
伊真希望共咱台灣唯一的戲曲文化
佇台灣土生土長的文化
會當閣較發揚佇咧
除了咱本土 咱台灣以外
國際上伊嘛希望會當看著遮爾媠的戲曲文化
伊定定攏講一句話
伊毋認老 食到老 學到老
無牙嘛欲哺土豆
嘛是欲共歌仔戲傳承落去
陳亞蘭講，楊麗花也直透綴時代咧行，用電腦科技結合歌仔戲，佇劇場演出，予歌仔戲通
一直創新、唌少年人來看。牽教徒弟的熱情也一直攏佇咧，陳亞蘭講，只要伊有推出作品
，楊麗花猶是會針對劇本、音樂、搬戲調度等方面，共伊指導，對真濟方面攏會當看出楊
麗花對歌仔戲的堅持佮熱情。
洪家馨/編輯