公視新聞網 https://news.pts.org.tw/article/675042
民團辦活動紹介紅龜粿 親子聽故事閣兼做粿
張君豪 / 新竹報導
發布時間：2024-01-06 19:15 更新時間：2024-01-06 19:51
https://www.youtube.com/watch?v=9Htf07Fc16c
後個月就是舊曆過年，袂少人會趁過年前、佇厝內炊粿，新竹市本土語推廣協會，初六去
清華大學舉辦親子活動，現場有台語老師逐家認捌紅龜粿的故事，閣用黏塗，予逐家
體驗做紅龜粿，提早感受過年的氣氛。(這則新聞標題、前言、內文為臺語文。)
老師講故事：「紅龜粿規个面笑嗨嗨，伊講足歡喜揣著真濟好姊妹，就相招出去耍。
」
透過講故事的方式，予現場的囡仔知影紅龜粿生做啥物款，故事中除了有紅龜粿，閣有發
粿、麵龜等等，攏是真濟民眾過年時攏會攢來拜拜的物件，囡仔嘛對過程中學著各種台語
的講法。
家長表示：「一般攏是過年時才會食，敢是過年抑是拜拜我嘛毋知。就想今仔日講故事這
个題材，就囡仔來聽，趣味，予囡仔有機會練習台語。」
民眾表示：「按呢教上好，做一个示範，有一个實品予囡仔看，才閣共囡仔教按呢上好。
」
現場囡仔體驗做紅龜粿：「加油，揤較大力。」
活動中閣予囡仔用黏塗佮模仔體驗做紅龜粿。無論大人囡仔逐家攏耍甲真歡喜。
新竹市本土語推廣協會秘書長鄭玉鳳表示：「透過手作的過程、實際做的過程，來知影一
寡做粿台語的名詞佮材料，譬如講秫米、粿模、閣有粿粞(kóe-chhè)等等的名詞，按呢
透過實際的製作方式，囡仔就會閣較會記得遮的名詞。」
趣味的台語活動，毋但予逐家學台語、講台語，嘛提早感受過年過節的氣氛。
張曼亭/編輯