公視新聞網 https://news.pts.org.tw/article/676824
臺灣老師佇法國大學開台語課 交流文化拍影片
呂尚儒 莊浚佑／臺北報導
發布時間：2024-01-17 19:15 更新時間：2024-01-18 08:33
https://www.youtube.com/watch?v=9IvRFKuatTc
想袂到有外國人唱茄仔卵的浪流連唱甲遮爾紲拍，這是法國東方語言佮文化學院(INALCO)
的臺語課，這門課是咱臺灣老師劉展岳開的，伊予法國學生唱臺語歌學臺語，嘛成立
YouTube頻道，予學生去揣蹛佇法國的臺灣人學臺語和臺灣文化，這門課自2020年變做正
式的選修課到今已經四年囉。
法國東方語言佮文化學院臺語課老師劉展岳表示：「文化的部份其實對臺灣的食啦，咱的
歌手、電影，佮臺灣定定咧講的影片，其實in攏誠有興趣，其實這嘛是一个文化誠有實力
的一部份，臺灣文化的一部份，所以其實是漸漸、漸漸，知影講臺灣是啥、臺灣佇佗位。
」
劉展岳是屏東人，自細漢就講臺語，伊用臺語和日常的文化體驗，共咱豐富的內涵分享予
法國人了解，嘛幫助濟濟想欲來到臺灣迌、食頭路的法國學生，了解臺灣。下學期這門
臺語課，嘛會和臺師大臺文系合作，予臺灣的學生來教法國的學生，學臺語、互相交流。
臺灣師範大學台文系主任許慧如表示：「有一寡學生伊是有想欲做臺語老師，所以希望佇
咧教學，我是希望佇咧這个部分，會當有較濟教學的經驗，閣來就是講有一點就是欲予學
生，會當予參加的人毋但是知影，而且會當親身去體會著講，其實臺灣 就是對外國人來
講，臺語是一个對臺灣足有代表性的物件，透過這个過程，嘛會當了解講對外國(按怎)來
看臺灣。」
系主任許慧如表示，因為咱和法國時差7點鐘，下學期拍算用線頂的方式進行。伊誠肯定
劉展岳老師的教學方式，予法國學生通用文化體驗的情境來學臺語，嘛向望臺灣的學生佇
未來的交流過程，除了累積寶貴的教學經驗，閣較重要的是會當了解無仝款的國際觀點。
陳玟芯/編輯