公視新聞網 https://news.pts.org.tw/article/677313
臺南逐年新正進前 招民眾體驗封平安茶活動
李晨宇 臺南報導
發布時間：2024-01-20 19:15 更新時間：2024-01-20 19:56
https://www.youtube.com/watch?v=laqrs8kCuEE
連鞭欲過年，臺南和勝堂佮普濟協會佇舊曆過年前，會辦封平安茶活動，共舊年囥佇甕仔
的茶米，提出來泡予逐家啉平安，閣會封新的茶米囥入甕仔，才提去神明桌拜一年，逐年
攏按呢延續落去。
廟方人員沓沓仔徙振動，共這个佇廟內囥一冬久的甕仔捀出來，舊年封的茶米，準備欲做
開封的儀式。每冬舊曆過年進前，臺南和勝堂參普濟協會攏會辦封平安茶文化活動，共舊
年封起來的茶米拍開了後，才閣封新的入去甕仔內。廟方講，每冬濟濟民眾會來體驗，予
逐家那 khat茶米那祈求新年的願望，落尾才閣提去神明桌拜一冬。
廟方指出，今年拄仔好是12冬一科的王獻大典，配合封茶文化，嘛特別準備一包茶米欲添
載予代天巡狩，祈求眾神庇佑地方平安。毋干焦按呢，連附近的高中生嘛實際來行踏、熟
似在地文化，甚至閣發揮專長來遮做茶師，提舊年封的茶米泡予逐家啉平安。
一年一改的封茶文化，到今愈辦愈盛大，廟方這改激頭腦發揮創意，壽桃有添壽的意涵用
這个殼仔，通予眾人共平安茶米貯轉去。希望用這趣味的方式，予眾人認捌社區多元的宗
教文化。
張曼亭/編輯