公視新聞網 https://news.pts.org.tw/article/681430
「輕軌」臺語按怎唸？ 「臺灣地名計畫」有通參考
發布時間：2024-02-19 19:15 更新時間：2024-02-19 19:53
https://www.youtube.com/watch?v=XRFxe3LcXvE
最近高雄輕鐵的發音，佇咧網路引起真濟討論。教育部自2019年就有委託學術界做「臺灣
地名計畫」的調查，針對捷運、臺鐵等等的站名、地名，去錄臺語和客語的講法，欲提供
予大眾運輸做發音的見本。連這改引起爭議的輕鐵，這个計畫的研究員也講，佇日本時代
，就有「輕鐵」這个臺語的講法。(本則新聞標題、導言、內文皆為臺語文)
高雄"輕鐵"這兩字的發音，最近佇網路吵甲真熱。捌協助教育部研究臺灣地名的研究員指
出，其實"輕鐵"這兩字，自日本時代就有文獻記錄、民間嘛有咧講，講的就是比火車較簡
單的輕便車。
"以本土語言標注臺灣地名計畫"研究員 黃偉嘉：「咱講臺鐵就是大火車，若是較輕便的
，就號做輕鐵，所以咱日本時代講的輕鐵，事實上是人咧的輕便車。這馬這種的輕軌，
事實上是食電的，但是咱嘛是有這个名詞，而且咱臺語足久以前就有咧講輕鐵這个詞，所
以我感覺咱輕軌共伊講做輕鐵應該是無啥物問題」
為著欲共一寡古早的臺語地名揣轉來，教育部自2019年就有委託學術界做"臺灣地名計畫"
的研究調查，針對捷運、臺鐵等等站名、地名錄臺語和客語，提供予大眾運輸做發音的參
考。計畫主持人表示，怹的目的就是希望臺語無鼓勵用華語取代，抑是照字翻，也著保留
語言背後的文化底蒂。
臺灣師範大學台史所所長 康培德：「上慘上慘就是直接提華語按怎叫，咱就共彼个字提
來做臺語的文讀，照理講其實咱假使本底咱若是講原來的土音，抑是講白話音，其實家己
就有一个講法，其實應該會使用創詞的概念，去創造一个較好概念出來，這其實是真好的
代誌」
親像臺鐵有一站華語叫做山佳火車站，其實用臺語的舊地名山仔跤來唸，隨就會當了解伊
的地理和地形。
"以本土語言標注臺灣地名計畫"研究員 黃偉嘉：「事實上咱在地人是講山仔跤，就是山
的下跤的意思，伊尾仔就雅化，做山佳這个字。用佇咱火車站、國小嘛好，攏是用山佳這
字，但是咱唸的時陣嘛是愛講山仔跤較著」
另外嘛有民眾反應，定有公車共臺中的大雅ngé區讀做大ngá，共臺南的延平郡王祠，共
郡讀做tsún。研究員表示，若是交通部會當參考教育部的台灣地名計畫的調查結果，就
會當改善這寡發音的爭議。
張曼亭/編輯