公視新聞網 https://news.pts.org.tw/article/682040
台語文冊市草好 前衛出版佇臺北冊展辦講座
發布時間：2024-02-22 19:15 更新時間：2024-02-22 20:16
https://www.youtube.com/watch?v=LQag7T7pY7c
台北國際冊展當咧舉辦，其中注心臺灣文化佮台語文的出版社─前衛出版社，逐工攏辦講
座，邀請專家來講佮臺灣文化相關的智識。另外，出版社也表示，台語文的冊這幾年市草
是真好，銷售3量會當講是翻倍咧成長。(本則新聞標題、導言、內文皆為臺語文)
臺灣媽祖信仰興旺，北港媽佮新港媽，是通人知；毋過是因為笨港天后宮重起，才予兩个
所在的媽祖信仰發展興旺，這是濟濟人較毋知的臺灣文化歷史
文史工作者 溫宗翰：「民間信仰內底真重要的就是香火，所以咱有一个觀念就是講，咱
的香火愛去揣著一个起源地，笨港天后宮後來算做講重起嘛，重起了後有的講法就講伊是
北港朝天宮，另外一个講法是講是新港奉天宮」
當咧台北國際冊展展出的前衛出版社，毋但賣冊，也辦佇會場辦講座予民眾認捌臺灣文化
。前衛表示，這幾年參生活相關、臺灣文化類型的冊，真受歡迎。
民眾 邱先生：「我是老師，有一寡教學的需要，想講也予囡仔了解這片土地發生的代誌
」
前衛出版社主編 鄭清鴻：「你日常生活當中，你摸會著、食會著、看會著的物件，就是
逐家欲想欲去了解。像歌謠嘛是仝款，你台語歌聽遮濟，但是洪一峰的故事你敢知影」
注心出版台語文冊的前衛也發現，台語文相關的冊，這幾年市草愈來愈好。
前衛出版社主編 鄭清鴻：「咱這馬咧做台語文的冊，攏會佮有聲冊，就是講你聽無，無
要緊，你就是放咧罔聽。甚至是講咱共誠濟有知名度，世界的囡仔古，遮的誠出名的故事
，共伊翻譯做台語，這予逐家有一个興趣」
前衛表示，過去台語文冊，一刷1000本、可能攏賣袂了，但是這幾年台語文當時行，親像
台文版的出名小說《小王子》，就已經賣了一萬本。就是上好的證明。
張曼亭/編輯