https://news.pts.org.tw/article/685947
注心傳承古早建築彩繪 藝師陳穎派92歲過身
發布時間：2024-03-18 19:15 更新時間：2024-03-19 08:23
楊舒晴 / 彰化報導
https://www.youtube.com/watch?v=bWbxrlYVQ2c
彰化縣傳統建築彩繪保存者－陳穎派佇這個月12過往，食到92歲，陳穎派十外歲就出師，
開始做廟宇彩繪，保留「褙布拍塗底」的傳統工法，畫圖細路風格多變化，毋但家族仔的
後代袂少人攏綴咧做傳統彩繪這途，伊嘛用心牽教有興趣的司仔，培養真濟弟子，予傳統
建築彩繪這門工夫世代相傳。（此則新聞標題、導言、內文皆為臺語文。）
一盆一盆的花籃，攏是咧數念這个月12過往的，傳統建築彩繪藝師－陳穎派，陳穎派細漢
綴爸爸陳萬福學工夫，十外歲就出師，堅持用古早的桐油加色粉落彩繪，保留傳統的披麻
補塗，攏是這陣愈來愈罕得看著的傳統工法
陳穎派後生陳敦仁，「披麻補塗啦、這款的就是，大部份攏用佇木材較濟啦，因為較早廟
攏較濟木建構，木材有當時仔較會損壞，損壞親像破空、必開，你就是用這來做補塗、共
補予平。」
陳穎派藝師，有派司的稱呼，後生孫仔攏是傳統彩繪藝師，是中部地區規模上大的彩繪家
族，陳穎派七十外年的彩繪人生，替臺灣的廟宇、建築，留下珍貴的文化資產，過去嘛捌
予人邀請去大學教課，予傳統彩繪世代相傳。
臺藝大古蹟藝術修護學系退休教授王慶臺，「這是臺灣一直有保存落來的物件，所以阮就
邀請陳穎派來教學生，慢慢仔、老師因為年歲大矣，阮就共傳承的部份，交予敦仁老師佮
文俊老師，目前臺灣家族企業閣有咧做，應該干焦這个派系。」
陳穎派後生陳敦仁，「正式佮阮老爸學是我國中畢業，第一个案場是鹿港天后宮，南投的
藍田書院，和美的道東書院，彰化元清觀啦。」
陳敦仁表示，伊前前後後綴爸爸陳穎派，完成百外間的廟宇彩繪，尤其堵頭佮堵仁的設計
，是穎派的招牌特色，伊講爸爸定定講「工課若欲好，愛用心落去做」，伊嘛一直共這句
話囥佇心肝底，會延續穎派的精神，繼續畫落去，予傳統建築彩繪這門工夫，世代相傳。
洪家馨/編輯