公視新聞網 https://news.pts.org.tw/article/688203
倚7成民眾講母語當咧消失 3成7呵咾母語教育
發布時間：2024-04-01 19:15 更新時間：2024-04-02 10:47
https://www.youtube.com/watch?v=erdgofjFOg4
目前政府當咧推動雙語教育，毋過黃昆輝教授教育基金會，拜六有公佈一份「台灣母語教
育民意調查」，其中有問民眾對目前母語教育的看法，嘛有針對外來語言和母語敢會互相
影響進行民調。調查顯示，欲7成的民眾認為國內母語當咧消失，而且嘛干焦37%的民眾，
認為學校推動母語教育的效果袂bái。
人攏講學語言上好對細漢開始，毋過考試引導教學，提英語佮母語兩種來比，雖罔社會上
真濟人攏煩惱母語會消失去，不過實際上，注重英語的比例是濟過母語。
民眾吳謝先生講：「英文的優先度絕對比台語閣較大，應該大部份的家長都會按呢想。」
藍小姐講：「因為in這馬上班會以英語為重，因為學校教的(台語)伊可能猶是用袂著，是
用佇考試的方面。」
黃昆輝教授教育基金會頂日仔發表一份"台灣母語教育民意調查"。目前政府當咧推動雙語
教育，調查嘛顯示，大約有三成的民眾煩惱，台灣母語會因為外來語言的影響，愈來愈無
受著重視，毋過有6成2、閣較濟民眾袂煩惱，感覺無啥要緊。
民眾林小姐講：「我感覺講，就是學英文佮學台語，其實會當同齊進行按呢，因為其實囡
仔會當就是家己會知影欲講什麼語言。」林小姐講：「畢竟規个大環境應該是佮老一輩，
咱家己的序大，是講台語較濟，英語的部份，是另外學的感覺，較袂有遐大的影響，當然
學校若有空堂、有時間，猶是會當加推廣咱的母語。」
面對這份報告，有學者認為，雙語政策會當拍破國家獨尊華語，毋過也煩惱政府資源有限
，會壓縮著台灣本土語言的資源。
台師大台文系副教授劉承賢講：「伊會當拍破台灣社會目前這種華語單一化、華語一元，
這个獨尊的現象，政府的資源是有限的，所以若是橐足濟資源，落去推這个雙語，我感覺
特別是sak英語的時陣，當然本土語言的資源就會變少。」
學者表示，台灣是一个多元語言的社會，望政府未來會當閣較重視各種母語，投入愈來愈
濟資源。抑若這份調查報告也顯示，倚七成的民眾認為台灣無仝族群的母語攏當咧消失。
其中針對目前學校推動母語教育的成效，嘛干焦3成7的民眾認為效果袂bái，遮的數字攏
值得政府重視。
張曼亭/編輯