公視新聞網 https://news.pts.org.tw/article/688419
高雄捷運欲起紫線 取消「民族大樂站」引質疑
發布時間：2024-04-02 19:15 更新時間：2024-04-03 08:56
https://www.youtube.com/watch?v=XENItvcrtgY
高雄捷運紫線的評估報告六月就欲完成，毋過有民代質疑，共本底規畫的民族大樂站取消
，彼爿是三民區上大的里，毋過輕鐵佮捷運站攏無佇遐設車站，地方認為有設站的必要。
市長陳其邁表示，會針對當地人口數、交通進行評估。
高雄捷運出入的民眾真濟，毋管是上班抑是上課的攏有，未來高捷閣欲增加一條紫線，也
已經公佈路線佮車站，有議員就發現，原本規劃佇民族路頂的民族大樂站，煞予取消，遮
附近鼎泰里是三民區上大的里，人口數有欲2萬5千人，里長表示講，目前無輕鐵佮捷運站
經過in社區，上倚近的捷運站就是文藻外語大學，行路愛十外分鐘，對序大是蓋無方便。
居民表示：「文藻是一个學區無毋著，有需要有必要，但是文藻遐的人 人口無遐濟，毋
是咱遮三民區，三民區你看，干焦咱這个里萬幾个(人)。」
高雄市三民區鼎泰里里長張吉雄表示：「希望會當這條線會當經過大樂，愛來逐家攏愛考
慮，愛佇大樂這站愛停。」
高捷局是將青線佮紫線欱做這馬的紫線，原底是青線的民族大樂站才予無去，議員認為，
這站附近有病院，社會住宅、河堤社區，居民遮濟，有設站的必要。
高雄市議員張博洋表示：「遮的設施其實攏是高度人口密集區，所以你佇這个所在，絕對
愛有一个捷運站，會當予咱遮的人，伊欲出入方便。」
高雄市市長陳其邁表示：「設站的這个部份，阮佇路線，目前會共河堤社區納入評估。」
市長陳其邁初二面對質詢的時陣也講，會考慮著河堤社區，目前猶未定案。捷運紫線，全
長有36公里，會經過三民、左營、楠仔坑等等6个行政區，沿路人口有80萬人。
陳玟芯/編輯